Մոնոպոլիաների դեմ պայքարով և գների աճով պետք է զբաղվի նույն մարմինը

Այսօր լրագորղների հետ հանդիպմանը Հայաստանի սպառողների միության նախագահ Արմեն Պողոսյանը հայտնեց, որ սպառողական շուկայում այժմ կա երկու ակտուալ խնդիր՝ մենաշնորհների սանձումը և գների վերահսկողությունը, որոնք, սակայն, մի խնդրի երկու կողմերն են, և դրանք չի կարելի առանձին դիտարկել:

«Այն մոտեցումը, որ հետևողականորեն մեզ հրամցվում է, որ պայքարը մենաշնորհների դեմ կամ ազնիվ և պատշաճ մրցակցության ուղղությամբ դա առանձին խնդիր է, իսկ գներով պետք է զբաղվեն այլ կառույցներ՝ սխալ է: Ես հերքում եմ և մերժում եմ այս մոտցումը», - նշեց նա:

Մենաշնորհների վիճակը մեր երկրում, ըստ բանախոսի, բոլորին հայտնի է. կա ձեռնարկություն, որը վերահսկում է դաշտի 98 տոկոսը կամ 70 և ավելի տոկոսը: «Այս երևույթներն անընդունելի են և պատժելի՝ օրենքի առումով: Մեր օրենսդրությունում ևս մի կետ կա, որը վերաբերում է դաշտում երեսուն տոկոսից ավելի զբաղեցնելուն: Սա պատժելի է, բայց ոչ անմիջապես: Այս ձեռնարկությունները հատուկ ուշադրության կենտրոնում են հայտնվում, ֆինանսական հոսքերի ավելի օպերատիվ վերահսկողություն է իրականացվում, և հետո, եթե չարդարացված գնային թռիչքներ են լինում, նոր կհետևեն պատիժները», - նշեց միության նախագահը:

Պատիժների մասին խոսելով՝ բանախոսը նշեց, որ պատժի ոչ թե դաժանությունն է կարևոր, այլ անվրեպությունը և դիֆերենցված մոտեցումը: «Եթե տարբեր ձեռնարկություների նույն խախտման համար պատժում ենք նույն չափով, սա վերածվում է նրան, որ մեծերը պարգևատրվում են, իսկ փոքրերը՝ սնանկանում, ինչպես եղավ ձու կամ հավամթերք արտադրելու ասպարեզում», - բացատրեց նա:  

«ՀՀ տնտեսական մրցակցության պետական հնձնաժողովը, ես ուզում եմ շեշտել՝ դա միակ հանձնաժողովն է, որը ունի այդպիսի ստատուս՝ պետական, որովհետև էլի ունենք հանձնաժողովներ: Այս հանձնաժողովի և՛ ֆունկցիաները, և՛ պատասխանատվությունը, և՛ ստատուսը յուրահատուկ են, և մենք սպասում ենք այնպիսի քայլերի, որոնք կնպաստեն գների և մենաշնորհների վերահսկողության խնդիրների լուծմանը», - նշեց նա՝ ափսոսանք հայտնելով, որ մյուս բանախոս, ՏՄՊՊՀ նախագահ Արտակ Շաբոյանը չի եկել ասուլիսին։