Հստակեցվում է թանկարժեք մետաղների բնագավառի քաղաքականությունը

ՀՀ կառավարությունն իր նախկին մի շարք որոշումներում կատարել է փոփոխություններ և լրացումներ, որոնցով հստակեցվել է թանկարժեք մետաղների բնագավառի քաղաքականությունը։

Մասնավորապես՝ «Գնագոյացման վերլուծական տեղեկատվական կենտրոն» ՊՈԱԿ-ի կողմից պետական կարիքների համար ապրանքների, ծառայությունների և աշխատանքների կողմնորոշիչ գների և սակագների սահմանման լիազորությունը վերապահվել է ՀՀ ֆինանսների, իսկ թանկարժեք մետաղների բնագավառի քաղաքականության իրականացումը, արտոնագրերի տրամադրումը, որակավորման քննությունների կազմակերպումը և առուվաճառք իրականացնող անձանց գործունեության վերահսկողությունը` ՀՀ էկոնոմիկայի նախարարությանը։

Լուծարվել է ՀՀ ֆինանսների նախարարության աշխատակազմի մետաղափորձական վերահսկողության տեսչությունը, որի գործառույթները փոխանցվել են նշված երկու նախարարություններին։ Սահմանվել է, որ թանկարժեք մետաղներից պատրաստված իրերի հատկորոշման, հարգադրոշմման արտոնագրումը և գործունեության պահանջների ու պայմանների պահպանման, ինչպես նաև թանկարժեք մետաղների, դրանցից պատրաստված իրերի մասնագիտացված, այդ թվում` մանրածախ առուվաճառքի նկատմամբ հսկողություն իրականացնող ՀՀ կառավարության լիազորված պետական կառավարման մարմինն է ՀՀ էկոնոմիկայի նախարարությունը, իսկ տարբերանիշի և անվանանիշի գրանցման, հաշվառման և փորձաքննության, ինչպես նաև պետական պահուստների ուսումնասիրության գործառույթներն իրականացնող լիազոր մարմինը` ՀՀ ֆինանսների նախարարությունը։

Մեկ այլ որոշման մեջ կատարված փոփոխությունների նպատակն է ՀՀ էկոնոմիկայի նախարարության աշխատակազմի շուկայի և սպառողների շահերի պաշտպանության տեսչությունն օժտել Եվրամիության պահանջները բավարարող իրավասություններով՝ ապահովելով միջազգային չափանիշներին համապատասխան շուկայի և սպառողների իրավունքների պաշտպանությունը։