Ընդդիմությունը «տուպիկի» առաջ ա․ Սաղաթելյանի ասած՝ «ժամեր են մնացել» արտահայտությունը դա է վկայում

«Նմանատիպ գործողություններով փորձում են գործընթացի իմիտացիա ստեղծել». Այս մասին այսօր՝ մայիսի 31-ին, խոհրդարանում ճեպազրույցի ժամանակ ասաց ԱԺ նախագահ Ալեն Սիմոնյանը՝ խոսելով ընդդիմադիր ուժերի ու քաղաքացիների երեկվա այցի մասին՝ կառավարության շենք, հայտարարեց, որ ընդդիմությունը հարցադրումներ անելու բազմաթիվ հնարավորություններ ունի՝ առանց շոուներ կազմակերպելու, խորհրդարանի դահլիճում, կառավարության հետ հարցուպատասխանի ժամանակ, կարող են նաև գրավոր դիմել:

Դիտարկմանը, որ իրենք դուրս են եկել փողոցային պայքարի, որպեսզի իշխանություններին հեռացնեն, հետևաբար գալիս են ԱԺ հարց տան, որ ի՞նչ լինի․

«Բա ինչի՞ մանդատները վայր չեն դնում, որ դուրս են եկել փողոց»։

Դիտարկմանը, որ ընդդիմադիրները հայտարարում են, թե ժողովուրդն է տվել այդ մանդատը, Սիմոնյանը հարցրեց՝ բա ինչի՞ չեն գալիս գործի․

«Ժողովուրդը մանդատ է տվել, որ փողոցում լինե՞ն։ Իրենք իրենց թույլ են տալիս ասել, որ վարչապետն ու իշխանությունն իրենց լեգիտիմիությունը կորցրել են, բայց ակնհայտ է, որ այդ լեգիտիմության խնդիրը հենց իրենք ունեն, որովհետև անգամ իրենց մանդատ տված 21 տոկոսի 2 տոկոսը փողոց դուրս չեն գալիս ու իրենց չեն աջակցում։ Սա վերածվել է մարդկանց ներվայնացնելու, խցանումներ ստեղծելու մանյայի։ Իրենք գտնվում են շատ ծանր կացության մեջ։ Իրենք մնացել են իրենց պրյոմի տակ»։

Հարցին՝ իշխանությունը կօգնի՞ ընդդիմությանը դուրս գալ այդ կացությունից, Սիմոնյանը բացասական պատասխան տվեց․

«Մենք իրենց թույլ ենք տալու մինչև վերջ մաշեցնել իրենց բոլոր հնարավորությունները։ Ես ժողովրդից ներողություն եմ խնդրում այս խցանումների համար։ Խնդրում եմ մի քիչ դիմացեք, այս ամենը կավարտվի»։