Քննարկվել է ՀՀ պետական կառավարման մարմինների զարգացման ծրագիրը

Դեկտեմբերի 16-ին ՀՀ պետական մարմինների ներկայացուցիչները դոնոր կազմակերպությունների հետ համատեղ քննարկել են Պետական կառավարման մարմինների զարգացման համապարփակ ծրագրի (CIB) շրջանակներում մշակված Ինստիտուցիոնալ բարեփոխումների ծրագրերը (IRP):

Համաժողովը համանախագահում էին ՀՀ էկոնոմիկայի նախարար Տիգրան Դավթյանը և ԵՄ պատվիրակության նորանշանակ ղեկավար դեսպան Տրայան Հրիսթեան:

Այս ծրագրի համար 2011-2013 թթ.-ին Եվրամիությունը Հայաստանին տրամադրել է առնվազն 32 մլն եվրո: Ծրագիրը մշակվել է Արևելյան գործընկերության յուրաքանչյուր գործընկեր երկրի համար առանձին` բարեփոխումների գործընթացն արագացնելու համար:

CIB ծրագրի նպատակն է աջակցել Հայաստանի այն առանցքային մարմինների ինստիտուցիոնալ կարողությունների հզորացմանը, որոնք նշանակալի դերակատարում կունենան Եվրամիության և Հայաստանի Հանրապետության միջև ապագա համաձայնագրի համար հիմք նախապատրաստելու ու այն իրականացնելու գործում: Այն հիմնականում ուղղված է լինելու կարողությունների հզորացմանը, թույլ կողմերի բացահայտմանը և վերապատրաստումների, տեխնիկական աջակցության և սարքավորումների միջոցով բացերի լրացմանը:

Հայաստանում CIB ծրագիրն ուղղված է երեք հիմնական ոլորտներում բարեփոխումների իրականացմանը.

ա) Ասոցացման համաձայնագրի բանակցությունների նախապատրաստում, համաձայնագրով նախատեսված դրույթների իրականացում,

բ) աջակցություն արդարադատության, ազատությունների և անվտանգության ոլորտին,

գ) աջակցություն ԽՀԱԱՀ նախապատրաստական աշխատանքներին:

2010-2011 թթ.-ի ընթացքում ԵՄ-ն, սերտորեն համագործակցելով Հայաստանի կառավարության հետ, համակարգել է, թե ապագա ինստիտուցիոնալ բարեփոխումների ծրագրերում ներառված որ հաստատություններն ու աշխատանքներն աջակցություն կստանան ԵՀՔԳ (եվրոպական հարևանության քաղաքականության գործիք) միջոցներից` CIB ծրագրի իրականացման համար: Արդյունքում՝ ՀՀ կառավարությունը նախապատրաստել է յուրաքանչուր ոլորտի համար ինստիտուցիոնալ բարեփոխումների երեք ծրագիր, որոնք սույն միջոցառման ընթացում կներկայացվեն քննարկման:

CIB-ն կհամաֆինանսավորվի Հայաստանի և Եվրոպական հանձնաժողովի կողմից, ու այն բաց է՝ այլ դոնորներ կազմակերպությունների կողմից անկանխիկ (օրինակ` գործուղումների միջոցով) համաֆինանսավորման և ներդրումների համար:

2010 թ.-ի նոյեմբերի 26-ին ԵՄ և Հայաստանի Հանրապետության միջև ստորագրվել է փոխըմբռնման հուշագիր Շրջանակային փաստաթղթի վերաբերյալ, որը երկու կողմերին պարտավորեցնում է լիարժեք կերպով համագործակցել CIB-ի արդյունավետ իրականացման համար: