Փաշինյանն ինձնից կաշկանդվածություն չի ակնկալում․ վերջին 3 տարիների աշխատանքս դա է վկայում. Աննա Վարդապետյան

ՔՊ-ի կողմից գլխավոր դատախազի թեկնածու Աննա Վարդապետյանից լրագրողները հետաքրքրվեցին, թե արդյոք Նիկոլ Փաշինյանի օգնականը լինելու հանգամանքը չի կաշկանդելու հետագայում իշխանության վերաբերյալ որոշումներ կայացնելիս:

Ի պատասխան Աննա Վարդապետյանն ասց, որ երբ 2020-ին աշխատանքի է անցել վարչապետի օգնականի պաշտոնում, ինքը Նիկոլ Փաշինյանին հարցրել է, թե ո՞րն է վարչապետի ակնկալիքն իրենից, ստացել է պատասխան՝ այլընտրանքային կարծիքը, եթե անգամ այդ կարծիքն իրեն դուր չգա:

Անդրադառնալով նրան, որ 44-օրյա պատերազմում զոհված զինծառայողների ծնողները դիմել են գլխավոր դատախազին, որ Նիկոլ Փաշինյանին մեղադրյալ ճանաչեն, ինքը  կաշկանդվածություն չի՞ ունենա այդ հարցում որոշում կայացնելիս, Աննա Վարդապետյանն ասաց. «Ես համոզված եմ, որ պարոն Փաշինյանն ինձնից կաշկանդվածություն չի ակնկալելու, վերջին տարիների մեր աշխատանքը դա է ցույց տալիս»:

Ինչ վերաբերում է նրան, որ ծնողները պահանջում են այդ գործը ՔԿ-ից տեղափոխել ԱԱԾ, նա ասաց. «Եթե հետեւել եք ընթացքին, գործն ուղարկվել է Քննչական կամիտե ամբողջ ծավալով քննություն իրականացնելու համար: Գործը ԱԱԾ տեղափոխելու դեպքում մենք ունենում ենք լուրջ շահերի բախում: Դուք գիտեք՝ ԱԱԾ-ն իր կառուցվածքով որտեղ է գտնվում, իսկ ՔԿ-ն ինքնավար եւ անկախ մարմին է: ԱԱԾ-ում այդ գործի քննությունը բերելու է բազմաթիվ քաղաքական շահարկումների»:

Այսօր ավելի վաղ ՔՊ խմբակցության ղեկավար Հայկ Կոնջորյանը լրագրողներին հայտնել էր, որ Գլխավոր դատախազի իրենց թեկնածուն վարչապետի օգնական Աննա Վարդապետյանն է:

Աննա Վարդապետյանն անդրադարձավ նաեւ իր անձի հետ կապված սկանդալին, երբ պարզվել էր, որ ինքը միջամտել է Ռուբեն Հայրապետյանի եւ նրա որդուն վերաբերող գործի քննությանը. «Կա վերջնական օրինական ուժի մեջ մտած դատական ակտ. ԱԱԾ-ն հիմք ընդունելով Ռուբեն  Հայրապետյանի փաստաբանի հաղորդումը, նյութեր էր նախապատրաստել եւ դրա արդյունքում ես իքնս էլ շատ մանրամասն բացատրություն եմ տվել: Նյութերի նախապատրաստման արդյունքում ԱԱԾ քննչական դեպարտամենտը արարքում հանցակազմ չկա:

Ինձ եղել է դիմում մասնագիտական քննարկում իրականացնելու այդ գործի հետ կապված: Ես իրավունք չունեմ բացահայտելու, որովհետեւ մասնագիտական քննարկումը նախաքննական գաղտնիքով է սահմանափակված եղել: Տարիներ շարունակ լինելով ԵՊՀ դասախոս, եթե մարդիկ ունենում են իրավական հարցի շուրջ մասնագիտական քննարկման անհրաժեշտություն, ես սիրով իմ մասնագիտական կարծիքը ասում եմ: Այդ կարծիքը որեւէ մեկի համար պարտադիր չէ եւ չի կարող լինել: Կա նաեւ վերաքննիչ դատարանի կողմից կայացված վերջնական դատական ակտ»,-ասաց նա:

Հիշեցնենք, որ սեպտեմբերի 16-ին լրանում է ՀՀ գլխավոր դատախազ Արթուր Դավթյանի պաշտոնավարման ժամկետը: Գլխավոր դատախազն Ազգային ժողովի իրավասու մշտական հանձնաժողովի առաջարկությամբ ընտրվում է Ազգային ժողովի կողմից` պատգամավորների ընդհանուր թվի ձայների առնվազն երեք հինգերորդով, վեց տարի ժամկետով:

Ինչպես արդեն հայտնել ենք, «Քաղաքացիական պայմանագիր» խմբակցությունը ՀՀ գլխավոր դատախազի պաշտոնում կառաջադրի Աննա Վարդապետյանի թեկնածությունը: