Երկաթյա բրեկետներով բուժում պետք է նշանակեք չարին․ կեղտին չպետք է տուրք տաք․ ՔՊ-ականը՝ Վարդապետյանին

«Երկաթյա բրեկետներով բուժում պետք է նշանակեք չարին․ կեղտին չպետք է տուրք տաք». Այս մասին այսօր՝ հունիսի 29-ին, Ազգային ժողովում ասաց քպ-ական պատգամավոր Վահագն Ալեքսանյանը՝ դիմելով  Գլխավոր դատախազի պաշտոնում «Քաղաքացիական պայմանագիր» խմբակցության կողմից առաջադրված վարչապետի օգնական Աննա Վարդապետյանին:

«Երբ ստանձնեք Գլխավոր դատախազի պաշտոնը, Դուք պարտավոր եք լինել աշխարհում երբևէ ապրած ամենահամառ մարդը, ամենահամառ մարդը չարի դեմ պայքարում։ Այդ չարը միշտ արթուն է, այդ չարի ներկայացուցիչնեի ժանիքները միշտ սուր են, Դուք եք, որ պետք է խարտեք ու տափակեցնեք այդ ժանիքները։ Երբեք չմոռանաք, որ պարտավոր եք լինել կեղեքվածի, հարստահարվածի, ճնշվածի պաշտպանը և կեղեքողի, հարստահարողի, ճնշողի սարսափը։

ՀՀ քաղաքացին երկար է տառապել, քաղաքացուն թալանել են, քաղաքացուն իր զինվոր որդիների սպառազինության համար վճարված հարկերով էլիտար թաղամասերում դղյակներ, տարատեսակ սավանաներում կարմիր գրքում գրված կենդանիների որսի ուղեգրեր, գերէկզոտիկ կազինոներում խաղադրույքի ֆիշկաներ ու չգիտեմ էլ ինչէր են գնել։ Վերջում էլ եկել են, լավագույն դեպքում, երբ խղճով են գտնվել, պարզապես գնդակահարել են այդ քաղաքացուն, իսկ վատագույն դեպքում ծեծելով սպանել սրճարանի զուգարանում։

Սա է այն չարը, որի դեմ պայքարի ենք ուղարկում Ձեզ, տիկին Վարդապետյան։ Սրա ժանիքները պետք է խարտեք, կամ երկաթյա բրեկետներով բուժում նշանակեք»,- նշեց քպ-ական պատգամավորը։