Մեկ ամսում 1.2% գնաճ

2011 թ. դեկտեմբերի 6-ի ՀՀ ԿԲ խորհրդի նիստին մասնակցում էին` ՀՀ ԿԲ նախագահ Արթուր Ջավադյանը,նախագահի տեղակալ Ներսես Երիցյանը, խորհրդի անդամներ Աշոտ Մկրտչյանը, Արմենակ Դարբինյանը, Օլեգ Աղասյանը, Ահարոն Չիլինգարյանը, Վախթանգ Աբրահամյանը:

Խորհրդի նիստը սկսվեց իրավիճակային հաշվետվության ներկայացմամբ, որտեղ քննարկվեցին գնաճի,արտաքին միջավայրի, իրական, հարկաբյուջետային և դրամավարկային հատվածների ընթացիկ զարգացումները: Ինչպես և ակնկալվում էր, 2011 թվականի նոյեմբերին 12-ամսյա գնաճը, նախորդ ամսվա նույն ցուցանիշի նկատմամբ նվազելով 0.9 տոկոսային կետով, վերադարձել է 4%±1.5 տոկոսային կետ տատանումների թույլատրելի միջակայք և կազմել 4.8%: Այս ցուցանիշին պարենային ապրանքների նպաստումը կազմում է 3.4 տոկոսային կետ, ոչ պարենային ապրանքների և ծառայությունների նպաստումները՝ համապատասխանաբար' 0.6 և 0.8 տոկոսային կետ:

Ըստ պաշտոնական վիճակագրության՝ 2011 թվականի դեկտեմբերին նախորդ ամսվա նկատմամբ արձանագրվել է 1.2% գնաճ, որը հիմնականում պայմանավորվել է պարենային ապրանքների գների 1.9% (նպաստումը գնաճին 1.0 տոկոսային կետ) աճով՝ ի հաշիվ «Բանջարեղեն և կարտոֆիլ», «Կաթնամթերք», «Հրուշակեղեն» ապրանքախմբերի գների աճի, որոնց ընդհանուր նպաստումն ամսական գնաճին կազմել է 1.2 տոկոսային կետ: Ոչ պարենային ապրանքների և ծառայությունների գների աճի նպաստումն ամսական գնաճին կազմել է ընդամենը 0.15 տոկոսային կետ:

Չնայած 2011 թվականի հոկտեմբերին Տնտեսական ակտիվության ցուցանիշը (ՏԱՑ) նվազել է և կազմել 2.4%, հունվար-հոկտեմբեր ժամանակահատվածի ՏԱՑ-ը գնահատվում է 5.9%: Ընդ որում, արդյունաբերության ճյուղում, հունվար-հոկտեմբեր ամիսներին նախորդ տարվա նույն ժամանակահատվածի նկատմամբ, թողարկման ծավալների աճը կազմել է 13.1%, գյուղատնտեսության ճյուղում' 14.1%-ով, որը գրեթե ամբողջությամբ պայմանավորվել է բուսաբուծության ենթաճյուղի 24.1% աճով: Անասնապահության ենթաճյուղում արձանագրվել է 0.5%անկում: Ծառայությունների ծավալներն աճել են 5.9%-ով, առևտրի ծավալները' 3.3%-ով: Շինարարության թողարկման ծավալները նշված ժամանակահատվածում նվազել են 20.8%-ով: Անկման հիմնական պատճառը, ինչպես նշվել էր նախկինում, միջազգային վարկերի,կազմակերպությունների և բնակչության միջոցների հաշվին իրականացվող շինարարության ծավալների կրճատումն է: Միջազգային վարկերի հաշվին իրականացվող շինարարության ծավալների անկումը պայմանավորված է ինչպես գյուղատնտեսության, ոռոգման և էներգետիկայի ոլորտներում միջազգային կազմակերպությունների կողմից ֆինանսավորվող ծրագրերի ավարտով, այնպես էլ խոշոր ճանապարհաշինական ևենթակառուցվածքների բարելավմանն ուղղված շինարարական ծրագրերի հետաձգմամբ: