Ռալֆ Յիրիկյան. «Հաջողության հասնելով հայրենիքում` մենք պարտավոր ենք կիսել մեր ձեռքբերումները բոլոր հայերի հետ եւ նպաստել երկրի աճին»

ՎիվաՍել-ՄՏՍ-ի գլխավոր տնօրեն Ռալֆ Յիրիկյանը դարձել է Հայաստանի ամերիկյան համալսարանի Բիզնեսի եւ գործարար կառավարման ֆակուլտետի կողմից հիմնված` «Բիզնես առաջնորդության» մրցանակի առաջին մրցանակակիրը: Ըստ ՎիվաՍել-ՄՏՍ-ից ստացված հաղորդագրության, Ռալֆ Յիրիկյանը պարգեւատրվել է մասնագիտական նշանակալի մակարդակի եւ ձեռքբերումների, ինչպես նաեւ կազմակերպական կամ բնագավառային մակարդակում հստակ ռազմավարական տեսլականի արդյունավետ կիրառման համար

Դեկտեմբերի 17-ին Հայաստանի ամերիկյան համալսարանում կազմակերպված մեծարման հատուկ արարողության ժամանակ ՎիվաՍել-ՄՏՍ-ի գլխավոր տնօրեն Ռալֆ Յիրիկյանին շնորհվել է ՀԱՀ Բիզնեսի եւ կառավարման ֆակուլտետի` «Բիզնես առաջնորդության» մրցանակը:

Դասախոսներից, ուսանողներից, շրջանավարտներից եւ ՀԱՀ արտահամալսարանական շահագրգիռ մարմինների ներկայացուցիչներից կազմված կոմիտեն կողմ է քվեարկել ՎիվաՍել-ՄՏՍ-ի գլխավոր տնօրենին ՀԱՀ Բիզնեսի եւ կառավարման ֆակուլտետի հիմնած` Բիզնես առաջնորդության մրցանակի շնորհմանը: Ռալֆ Յիրիկյանը դարձել է առաջինն, ով արժանացել է այս մրցանակին:

Ամենամյա մրցանակը հիմնվել է ՀԱՀ Բիզնեսի եւ կառավարման ֆակուլտետի կողմից: Մրցանակակիրները որոշվում են հետեւյալ չափանիշներով.

• մասնագիտական նշանակալի մակարդակ եւ ձեռքբերումներ
• կազմակերպական կամ բնագավառային մակարդակում հստակ ռազմավարական տեսլականի արդյունավետ կիրառում
• աշխատանքային պայմանների զգալի որակական բարելավմանը նպաստող քաղաքականության եւ պրակտիկայի ներդրում կազմակերպության շրջանակում
• կորպորատիվ էթիկայի եւ պատասխանատվության կանոնների պահպանում
• կազմակերպության մոդելի համապատասխանություն կայուն գործարարության սկզբունքերին
• կենսական խնդիրներում հավատարմություն եւ ծառայում հասարակությանը

Մրցանակը Ռալֆ Յիրիկյանին հանձնել են համալսարանի նախագահ Բրյուս Պողոսյանը եւ Բիզնեսի եւ կառավարման ֆակուլտետի դեկան Էրիկ Գեւորգյանը:

Մրցանակաբաշխության պաշտոնական արարողությունից հետո, Էրիկ Գեւորգյանը խնդրանքով, Ռալֆ Յիրիկյանը ներկայացրել է արդյունավետ բիզնես առաջնորդի իր տեսլականը. «Կարելի է նշել արդյունավետ բիզնես առաջնորդության հարյուրավոր նախապայմաններ. շուկայի զարկերակը զգալու ունակությունը, մասնագետների լավ թիմի ձեւավորումը եւ դրա շարժիչ ուժ լինելը, բեկումնային գաղափարներն ի մի բերելու հմտությունը, ոլորտի միտումները հասկանալը, ինչպես նաեւ նորարարություններին եւ վերջին գիտական մշակումներին ծանոթ լինելը, եւ այլն: Անկասկած, թվարկվածներից բոլորն անհրաժեշտ, սակայն ոչ բավարար պայմաններ են կայուն բիզնես մոդել ստեղծելու համար: Մինչդեռ իրական առաջնորդությունը օրինակ ծառայելն է: Եվ դա չի սահմանափակվում նոր բիզնես վարքագծով կամ ընկերության բոլոր մակարդակներում սերմանված կամ արմատավորված մոտեցումներով: Որպես թիմ, մենք հավատացած ենք, որ ՎիվաՍել-ՄՏՍ-ի հաջողված բիզնես մոդելը պետք է տարածենք հայաստանյան ամբողջ բիզնես հանրության շրջանում»,- նշել է Ռալֆ Յիրիկյանը: «Եթե մենք կարողացել ենք ստեղծել հաջողած բիզնես, ապա կարող եք նաեւ դուք: ՎիվաՍել-ՄՏՍ-ը չէր կարող հաջողության հասնել առանց ՎիվաՍել-ՄՏՍ ընտանիքի անդամների: Հաջողության հասնելով հայրենիքում` մենք պարտավոր ենք կիսել մեր ձեռքբերումները բոլոր հայերի հետ եւ նպաստել երկրի աճին»,- եզրափակել է Ռալֆ Յիրիկյանը: