Ադրբեջանը նախատեսում է Տրանսանատոլիական գազատարի հզորությունը հասցնել 32 մլրդ խորանարդ մետրի. Ալիև

Ադրբեջանը նախատեսում է Տրանսանատոլիական գազատարի (TANAP) հզորությունը հասցնել 32 մլրդ խորանարդ մետրի, ասել է Ադրբեջանի նախագահ Իլհամ Ալիեւը, տեղեկացրել է «Ինտերֆաքս-Ադրբեջանը»։

«Մենք նախատեսում ենք կրկնապատկել բնական գազի արտահանումը Եվրոպա, եւ համոզված եմ, որ մենք դա կանենք։ Դրա համար պետք է կարեւոր քայլեր ձեռնարկվեն՝ քաղաքական որոշումներ, տեխնիկական միջոցներ, եւ, իհարկե, ներդրումներ։ Չէ՞ որ Հարավային գազային միջանցքի տարբեր հատվածների հնարավորությունները տարբերվում են։ TANAP-ի թողունակությունը կազմում է 16 մլրդ խորանարդ մետր, մենք նախատեսում ենք այն ավելացնել՝ հասցնելով 32 մլրդ խորանարդ մետրի»,- ուրբաթ ասել է Ալիեւը Իտալիայում, Չեռնոբիոյի 48-րդ միջազգային համաժողովում։

Նա ավելացրել է, որ Տրանսանատոլիական գազատարի (ТАР) թողունակությունը կազմում է 10 մլրդ խորանարդ մետր, եւ ներկայում այն աշխատում է լրիվ հզորությամբ։

«Մենք պետք է ավելացնենք թողունակությունը՝ գոնե 20 մլրդ խորանարդ մետր։ Դա, իհարկե, լրացուցիչ ֆինանսավորում կպահանջի։ Մենք դրան պատրաստ ենք՝ որպես երկիր եւ որպես ներդրող։ Բայց այստեղ եւս անհրաժեշտ է մեր թիմի մյուս անդամների մասնակցությունը»,- ասել է նա։

Ալիեւն ավելացրել է, որ Ադրբեջանի գազի հաստատված պաշարները կազմում են 2,6 տրլն խորանարդ մետր։

Եվրոպայում ներկայում ադրբեջանական գազ գնում են Իտալիան, Հունաստանը եւ Բուլղարիան։

Բացի այդ, ադրբեջանական գազն արտահանվում է նաեւ Թուրքիա (TANAP եւ Հարավկովկասյան խողովակաշարային մայրուղով) եւ Վրաստան (Հարավկովկասյան խողովակաշարային մայրուղով եւ Գազիմահոմեդ-Ղազախ գազատարով)։

TANAP-ի երկարությունը 1,85 հազար կիլոմետր է, նախատեսված է ադրբեջանական գազը Շահ Դենիզ հանքավայրից վրաց-թուրքական սահմանով Թուրքիայի արեւմտյան սահմաններ տեղափոխելու համար։ Թողունակությունը առնվազն 16 մլրդ խորանարդ մետր է, որոնցից 10 մլրդ-ն նախատեսված է Եվրոպա, 6 մլրդն՝ Թուրքիայի արեւմտյան շրջաններ արտահանման համար։