Հունաստանը դաշնակիցներին կտեղեկացնի Թուրքիայի սպառնալիքների մասին. ԱԳՆ

Հունաստանը դատապարտել է Թուրքիայի կողմից շարունակվող ագրեսիվ հռետորաբանությունը ու ամենօրյա սպառնալիքները և 1922 թվականին Փոքր Ասիայում տեղի ունեցած աղետի մասին մշտական ​​«հիշեցումները»: Այս մասին հայտարարել է Հունաստանի արտաքին գործերի նախարարությունը։

Վերջերս Թուրքիայի նախագահ Ռեջեփ Թայիփ Էրդողանը այնքան հեռուն է գնացել, որ ասել է, թե թուրքական զորքերը կարող են ներխուժել Հունաստան մեկ գիշերվա ընթացքում:

«Մենք անհապաղ կտեղեկացնենք մեր դաշնակիցներին և գործընկերներին վերջին մի քանի օրերի սադրիչ հայտարարությունների բովանդակության մասին՝ պարզելու, թե հատկապես վտանգավոր պահին ով է խաթարում մեր դաշինքի համախմբվածությունը», - ասվում է Հունաստանի ԱԳՆ հայտարարության մեջ։

«Միևնույն ժամանակ մենք կշարունակենք ծառայել որպես կայունության և անվտանգության հիմնասյուն ողջ տարածաշրջանի համար՝ հիմնվելով միջազգային իրավունքի և միջազգային ծովային իրավունքի վրա», - ասված է նախարարության նույն հայտարարության մեջ։