Տարանցիկ փոխադրումներ դեպի Եվրոպա

ՀՀ տրանսպորտի եւ կապի նախարար Մանուկ Վարդանյանը դեկտեմբերի 21-ին կայացած տարեկան ամփոփիչ մամուլի ասուլիսում ներկայացրեց նախարարության իրականացրած ծրագրերը եւ հետագա անելիքները:

2011թ. մայիսի 26-ին ք. Լեյպցիգում ստորագրվել է Հայաստանի Հանրապետության կառավարության և Գերմանիայի Դաշնային Հանրապետության միջև միջազգային ավտոմոբիլային փոխադրումների մասին համաձայնագիր: 2011թ. հուլիսի 7-ին Վարշավայում նախաստորագրվել է Հայաստանի Հանրապետության կառավարության և Լեհաստանի Հանրապետության կառավարության միջև միջազգային ավտոմոբիլային հաղորդակցության մասին համաձայնագիրը: 2011թ. հունիսի 14-ին ք. Երևանում ստորագրվել է Հայաստանի Հանրապետության տրանսպորտի և կապի նախարարության և Ավտոտրանսպորտի միջազգային միության միջև Հայաստանի Հանրապետության տարածքով Ասիայի, Եվրոպայի և հիմնական համաշխարհային շուկաների միջև ավտոտրանսպորտային փոխադրումների զարգացման մասին փոխըմբռնման հուշագիր:

2011թ. նոյեմբերի 22-24-ը Երևանում կազմակերպվել է ԱՊՀ անդամ-պետությունների Կապի տարածաշրջանային համագործակցության Ձայնային հաղորդակցության ցանցերի ռադիոհաճախականությունների ռեսուրսների ուսումնասիրման և օգտագործման հարցերով տեխնիկական փորձագետների Աշխատանքային խմբի 8-րդ նիստը:

Երեւանում կազմակերպվել է ԱՊՀ անդամ-պետությունների երկաթուղային տրանսպորտի խորհրդի 55-րդ նիստը:

Սևծովյան տնտեսական կազմակերպությունից ստացվել են 2012թ. ՍԾՏՀ տարանցիկ թույլտվությունները, որոնք հնարավորություն կընձեռեն թվով 200 հայկական փոխադրողներին Վրաստանից` Թուրքիայի տարածքով տարանցիկ փոխադրումներ կազմակերպել դեպի Եվրոպական պետություններ:

2011թ. մարտի 17-ին Երևան է ժամանել Վրաստանի տարածքային զարգացման և ենթակառուցվածքների նախարար Ռամազ Նիկոլաիշվիլիի գլխավորած պատվիրակությունը:

Այցի շրջանակներում ՀՀ տրանսպորտի և կապի նախարարությունում կազմակերպվել է երկկողմ հանդիպում, որի ժամանակ կողմերը քննարկել են տրանսպորտային ենթակառուցվածքների բնագավառում հայ-վրացական համագործակցության զարգացմանն ուղղված հարցերը:

Հանդիպման ավարտին կողմերը ստորագրել են տրանսպորտային ենթակառուցվածքների բնագավառում համագործակցության մասին Փոխըմբռնման հուշագիր:

2011թ. նոյեմբերի 7-8-ը Երևան է ժամանել Վրաստանի էկոնոմիկայի և կայուն զարգացման նախարար Վերա Կոբալիայի գլխավորած պատվիրակությունը:

ՀՀ տրանսպորտի և կապի նախարարությունում կազմակերպված երկկողմ հանդիպման շրջանակներում կողմերը քննարկել են ավտոմոբիլային ուղևորատար և բեռնատար փոխադրումների առկա իրավիճակը, ինչպես նաև զարգացման հեռանկարները:

Ձյան առատ տեղումների պատճառով 2011թ. նոյեմբերի 17-ից դեկտեմբերի 1-ը փակվել էր Կազբեկի - Վերին Լարս մաքսային անցակետը, որի պատճառով սահմանում կուտակվել էին դեպի Հայաստանի Հանրապետություն տեղափոխվող ավելի քան 120 բեռնատար ավտոմեքենա: 2011թ. դեկտեմբերի 1-ին ՀՀ տրանսպորտի և կապի նախարարության պատվիրակությունը մեկնել է Վրաստան և կազմակերպել նշված ավտոմեքենաների քարշակների միջոցով տեղափոխումը վրացական ճանապարհի դժվարանցանելի հատվածներում: Արդյունքում բոլոր մեքենաները տեղափոխվել են: