Մեկնարկել են «Ոռոգման համակարգերի վերականգնման» լրացուցիչ ֆինանսավորման ծրագրով նախատեսված աշխատանքները

ՀՀ փոխվարչապետ, տարածքային կառավարման նախարար Արմեն Գեւորգյանը ՏԿՆ ջրային տնտեսության պետական կոմիտեի նախագահ Անդրանիկ Անդրեասյանի, Ջրային տնտեսության զարգացման եւ բարեփոխումների ԾԻԳ-ի ղեկավար Ադիբեկ Ղազարյանի ուղեկցությամբ դեկտեմբերի 21-ին Կոտայքի, Արագածոտնի եւ Արմավիրի մարզերում ծանոթացավ Ոռոգման համակարգերի վերականգնման հրատապ լրացուցիչ ֆինանսավորման ծրագրով նախատեսված աշխատանքների մեկնարկին: Ծրագիրն իրականացվում է Համաշխարհային բանկի աջակցությամբ ու ՀՀ կառավարության համաֆինանսավորմամբ եւ, ըստ էության, «Ոռոգման համակարգերի վերականգնման հրատապ ծրագրի» առաջին մասի շարունակությունն է:

Կոտայքի մարզում փոխվարչապետն այցելեց Արզնի-Շամիրամի 1-ին հերթի ջրանցքի վերականգնման հատված: Ծրագրով նախատեսվում է վերականգնել 3,5 կմ:

Արագածոտնի մարզում Ա. Գեւորգյանը եղավ Արզնի-Շամիրամի 2-ին հերթի ջրանցքի տարածքում, որտեղ կվերականգնվի մոտ 5,5 կմ: Ստորին Հրազդան մայր ջրանցքի ներկա վիճակին եւ նախատեսվող աշխատանքներին փոխվարչապետը ծանոթացավ Արմավիրի մարզում: Ընդհանուր առմամբ կվերանորոգվի Ստորին Հրազդան ջրանցքի 5,3 կմ հատված: Վերոնշյալ տարածքներում աշխատանքներն արդեն մեկնարկել են:

Նշենք, այս ծրագրով նախատեսվում է մոտ 50 կմ երկարությամբ մայր եւ միջտնտեսային (գլխավոր) ջրանցքների վերանորոգում Արագածոտնի, Կոտայքի, Շիրակի, Լոռու, Արարատի եւ Արմավիրի մարզերում, եւ մոտ 63 կմ երկարությամբ ներտնտեսային ոռոգման ցանցի ջրանցքների նորոգում Լոռու, Շիրակի, Գեղարքունիքի եւ Արմավիրի մարզերում: Ծրագրի լրացուցիչ ֆինանսավորման ընդհանուր արժեքը 21,6 մլն դոլար է, այն նախատեսվում է ավարտել 2013թ. հունիսին:

Այցի շրջանակում փոխվարչապետն Արմավիրի մարզպետ Աշոտ Ղահրամանյանի ուղեկցությամբ եղավ նաեւ Էջմիածնի վարչական տարածքում գտնվող «Բիգա» եւ «Ամստեր ֆլաուերս» ընկերություններում: Առաջինը զբաղվում է սնկի արտադրությամբ, երկրորդ ընկերությունը՝ հիմնականում տնկանյութերի աճեցմամբ: ՀՀ կառավարության կողմից ընկերություններին արտոնություն էր տրամադրվել՝ 300 մլն դրամը գերազանցող ապրանքների ներմուծման դեպքում հաշվարկված ԱԱՀ -ի վճարման ժամկետը երեք տարի ժամկետով հետաձգելու վերաբերյալ: Դա նպաստել է ընկերությունների ընդլայնմանը:

«Բիգա» ընկերությունը ներկայումս իրականացնում է սնկի արտադրության նոր ծրագիր, որը կավարտվի գարնանը: Դա հնարավորություն կընձեռի գրեթե կրկնապատկել արտադրական ծավալները՝ ներկայիս օրական 800-1000 կիլոգրամից հասցնելով 1700-2000 կիլոգրամի: Արտադրանքի կեսից ավելին արտահանվում է:

«Ամստեր ֆլաուերս» ընկերությունում արդեն ավարտվել է ջերմոցային տնտեսության շինարարությունը, որն իրականացվել է հոլանդական տեխնոլոգիաներով եւ հոլանդացի մասնագետների ներգրավմամբ: Մշակվում է երեք տեսակի կուլտուրա՝ լոլիկ, վարունգ, պղպեղ, որոնց բերքը նախատեսվում է, որ 3-4 անգամ կգերազանցի սովորական արտադրողականության ցուցանիշը: Առաջին բերքը կստացվի արդեն հունվարին: Ընկերությունը նպատակ ունի տեղական շուկան ապահովել թարմ բանջարեղենով, որը թե որակով, թե գնով ավելի մրցունակ կլինի, քան ներկրվող գյուղմթերքը: Երկու ընկերություններում, ընդհանուր առմամբ, կստեղծվի 30-35 նոր աշխատատեղ:

Ա. Գեւորգյանը շրջայց կատարեց արտադրամասերում, ծանոթացավ պայմաններին, հնարավորություններին: Նա խրախուսելի համարեց գյուղատնտեսության ոլորտում առաջատար տեխնոլոգիաների կիրառումը՝ նկատելով, որ դրանք նպաստում են արդյունավետ գյուղատնտեսության զարգացմանը, նաեւ զբաղվածության ապահովման խնդրի լուծմանը: Փոխվարչապետը հույս հայտնեց, որ ընկերության դրական փորձը տարածում կգտնի նաեւ այլ մարզերում: