«Հայաստանում տարվա վերջին 4% անկում կգրանցվի, սակայն հայտարարվելու է 4% աճի մասին». Հրանտ Բագրատյան

«Հայաստանում տարվա վերջին չորս տոկոս անկում կգրանցվի, սակայն հայտարարվելու է չորս տոկոս աճի մասին: Այս տասնմեկ ամիսների ընթացքում գնաճը 12,5 տոկոս է: Իսկ բյուջեն 0,3 տոկոսով գերակատարվել է, այնինչ պետք է գերակատարվեր 4.3 տոկոսով», – այսօր «Հայելի» մամուլի ակումբում տեղի ունեցած ասուլիսի ժամանակ հայտարարեց Հրանտ Բագրատյանը։

Անդրադառնալով գյուղատնտեսությանը՝ նա նշեց, որ այդ ոլորտը կառավարությունը ցանկանում է փակել 10-12% աճով: Սակայն արտագաղթի պատճառով մարդիկ պակասել են, և գներն ինքնըստինքյան իջել են։

Նա նշեց, որ միայն այս տարվա ընթացքում 7,9% գնաճ է տեղի ունեցել, սակայն մեր երկրում աղքատությունը 35% է, ուստի աղքատ մասայի համար գնաճը 12,5% է։

«Ոչ մի արդյունավետ քայլ այս տարվա ընթացքում չեմ տեսել», – նկատեց Հրանտ Բագրատյանը։

Նա նշեց, որ արդյունաբերության աճ գոյություն չունի, հիմնականում այն հանքարդյունաբերության հետ է կապված։

Խոսելով Թռչկանի ջրվեժի մասին՝ Հրանտ Բագրատյանը ՀԷԿ-ի շինարարության դադարեցումը ճիշտ է համարում: «Շատ տեղեր կան, որտեղ կարելի է ՀԷԿ կառուցել, ինչու գնացին Թռչկանին կպան: Ես նաև չեմ հասկանում՝ ինչպես կարող է Շաքիի ջրվեժը փողով աշխատի, երեք հազար դրամ տալիս են, միացնում են: Չէր կարելի աշխարհի լավագույն ջրվեժներից մեկի վրա ՀԷԿ կառուցել», – ասաց նա: