«Գիլյոտինի» ինստիտուտը լուրջ անելիք ունի Հայաստանում

Այսօր տեղի է ունեցել ՀՀ կառավարության հերթական նիստը, որը վարել է ՀՀ վարչապետ Տիգրան Սարգսյանը։

Դեկտեմբերի 22-ն էներգետիկի օրն է, և վարչապետը նիստից առաջ կառավարության անունից շնորհավորել է ոլորտի բոլոր աշխատակիցներին, նրանց մաղթել բեղմնավոր աշխատանք և ջերմություն' ընտանիքում։ «Էներգետիկ ոլորտի այս տարվա արդյունքները բավական տպավորիչ են, - ասել է Տիգրան Սարգսյանը։ - Մի կողմից աճ է արձանագրվել, իսկ մյուս կողմից' էապես մեծացել արդյունավետությունը, ինչի շնորհիվ հնարավոր է եղել անփոփոխ պահել էլեկտրաէներգիայի սակագները։ Կարծում եմ' էներգետիկները կարող են հպարտանալ 2011-ի արդյունքներով», - շեշտել է վարչապետը։

ՀՀ կառավարությունն իր նախկին որոշումներից մեկում կատարել է փոփոխություն, ուժը կորցրած ճանաչել մեկ այլ որոշում, ինչը բխում է կառավարության որդեգրած քաղաքականությունից, այն է' Հայաստանում գործող տեխնիկական կանոնակարգումն աստիճանաբար մոտարկել Եվրամիության գործող հանձնարարականներին։ Այս նպատակով հանրային սննդի ծառայությունը հանվել է պարտադիր արտոնագրման ենթակա ցանկից։ Վարչապետ Տիգրան Սարգսյանը հանձնարարել է այս որոշումը ներկայացնել ԶԼՄ-ներին, որպեսզի բոլոր ձեռնարկատերերն իմանան, որ սերտիֆիկացումը սահմանի վրա վերացվում է։ «Սա էական բարելավում է լինելու արտահանողների և ներմուծողների համար, - ասել է Տիգրան Սարգսյանը։ - Ըստ էության սա «գիլյոտինի» աշխատանքի սկիզբն է։ Վերահսկիչ պալատի ներկայացրած տվյալները վկայում են, որ «գիլյոտինի» ինստիտուտը լուրջ անելիք ունի Հայաստանում։ Բազմաթիվ այսպիսի արհեստական գործառույթներ, որոնք բովանդակային առումով բացարձակապես չեն նպաստում սննդի անվտանգության բարձրացմանը, ստեղծում են կոռուպցիոն ռիսկեր, բյուրոկրատական քաշքշուկ, վատթարացնում բիզնես միջավայրը։ Այս օրինակը վկայում է, որ մենք լուրջ անելիք ունենք «գիլյոտինի» մասով։ Արդեն Ավստրիայի կառավարության գրանտը' 500 հազար եվրոն, ստացել ենք, որը հնարավորություն է տալու, որպեսզի այդ կառույցը մեծ թափով աշխատի»։