Երևանի ավագանին հաստատել է Երևան քաղաքի 2012թ. բյուջեն

Տնտեսություն 24 Դեկտեմբեր, 2011 7:24

Երևանի ավագանին դեկտեմբերի 23-ին գումարած նիստում միաձայն հավանություն է տվել Երևան քաղաքի 2012 թ. բյուջեի նախագծին։

Բյուջեն եկամուտների գծով կանխատեսվում է 63,716,652.5 և ծախսերի գծով՝ 63,766,652.5 հազ. դրամ, դեֆիցիտը՝ 50,000.0 հազ. դրամ։

Ներկայացնելով նախագիծը՝ քաղաքապետարանի աշխատակազմի ֆինանսական վարչության պետ Վահե Նիկոյանը նշել է, որ առաջարկվող բյուջետային ծախսերի ծավալներում սոցիալական բնագավառի ծախսերի (կրթություն, առողջապահություն, սոցիալական ապահովություն) տեսակարար կշիռը կազմում է 31.8%, շրջակա միջավայրի պաշտպանությանն ուղղված ծախսերինը՝ 11%, տրանսպորտի բնագավառին (այդ թվում՝ ճանապարհային տրանսպորտի) վերաբերող ծախսերինը՝ 32.4%։

Ավագանին միաձայն կողմ քվեարկությամբ հաստատել է Երևան քաղաքի բազմաբնակարան շենքերում աղբահանության վճար վճարողներին հաշվառելու, աղբահանության վճարը հաշվարկելու, ինչպես նաև այդ վճարը համայնքի բյուջե կամ արտաբյուջետային հաշիվ գանձելու լիազորությունները Երևան քաղաքի բազմաբնակարան շենքերի կառավարման մարմիններին վերապահելու, ինչպես նաև աղբահանության վճար վճարողների հաշվառման,աղբահանության վճարի հաշվարկման, ինչպես նաև այդ վճարի գանձման կարգը սահմանելու մասին որոշման նախագծերը: Անդրադառնալով աղբահանության վարձավճարի չափի վերաբերյալ որոշ լրատվամիջոցներով տարածված ոչ ճիշտ տեղեկատվությանը՝ քաղաքապետ Տարոն Մարգարյանը մեկ անգամ ևս ընդգծել է, որ Երևանի ավագանու որոշման համաձայն՝ աղբահանության վճարի չափը փաստացի բնակվող մեկ անձի համար սահմանվել է ամսական 200 դրամ։

Մայրաքաղաքի ներքաղաքային հասարարակական տրանսպորտի աշխատանքը կազմակերպելու նպատակով նոր ստեղծվող «Երևանի ավտոբուս» փակ բաժնետիրական ընկերության բնականոն գործունեությունն իրականացնելու համար Երևանի ավագանին հավանություն է տվել նաև ընկերության կառուցվածքը, հաստիքացուցակը և պաշտոնային դրույքաչափերը հաստատելու մասին որոշման նախագծին։

Ընդառաջելով բնակիչների կողմից ստացված դիմումներին՝ Երևանի ավագանին գույքահարկի գծով արտոնություն է սահմանել Երևան քաղաքի վարչական տարածքում գտնվող 2776 քաղաքացիներին սեփականության իրավունքով պատկանող՝ գույքահարկով հարկվող օբյեկտ համարվող գույքային միավորների գույքահարկի ժամկետանց հարկային պարտավորությունների նկատմամբ:

Ամփոփելով Երևան քաղաքի ավագանու 6-րդ նստաշրջանի աշխատանքները՝ Երևանի քաղաքապետ Տարոն Մարգարյանը շնորհակալություն է հայտնել ավագանու բոլոր անդամներին՝ շահագրգիռ քննարկումների և համատեղ ադյունավետ աշխատանքի համար։ Քաղաքապետը ավագանու անդամներին շնորհավորել է նաև գալիք Ամանորի և Սուրբ ծննդյան տոների կապակցությամբ։