Թուրքիան նպատակ ունի մոտ ժամանակներս հաստատել ՆԱՏՕ-ին անդամակցելու Շվեդիայի դիմումը

Թուրքիայի նախագահ Ռեջեփ Թայիփ Էրդողանը ՆԱՏՕ-ի գագաթնաժողովից հետո մամուլի ասուլիսի ժամանակ հայտարարել է, որ երկրի իշխանությունները մտադիր են մոտ ժամանակներս հաստատել դաշինքին անդամակցելու Շվեդիայի դիմումը։ Այս մասին հայտնում է РИА Новости-ն։

«Խոսք էլ չկա, որ խորհրդարանը հոկտեմբերին արձակուրդից վերադառնալուց հետո քննարկի արձանագրությունը... Մեր նպատակն է հնարավորինս շուտ ավարտել այդ խնդիրը», - ասել է Թուրքիայի ղեկավարը:

Շվեդիան Ֆինլանդիայի հետ միասին ՆԱՏՕ-ին անդամակցելու հայտ էր ներկայացրել դեռևս 2022 թվականի մայիսին։ Երկու պետությունների ինտեգրումը բախվել էր Թուրքիայի դիմադրությանը, որը սկանդինավյան երկրներից փոփոխություններ է պահանջել ահաբեկիչների, հատկապես քրդական խմբավորումների դեմ պայքարում, որոնք կապված են 2016 թվականի թուրքական հեղաշրջման փորձի հետ։

Եվ եթե Հելսինկին Անկարայի հետ բոլոր խնդիրները կարգավորեց և ՆԱՏՕ-ին անդամակցեց 2023 թվականի ապրիլին, ապա Ստոկհոլմը երկար ժամանակ չէր կարողանում համաձայնության գալ թուրքական կողմի հետ։ Միայն հուլիսի 10-ին Թուրքիայի նախագահ Ռեջեփ Թայիփ Էրդողանը համաձայնեց Շվեդիայի՝ ՆԱՏՕ-ին անդամակցելու մասին արձանագրությունը հնարավորինս շուտ ուղարկել Թուրքիայի խորհրդարան և սերտորեն աշխատել պատգամավորների հետ՝ ապահովելու արձանագրության վավերացումը։ Բացի Անկարայից, Հունգարիան նույնպես չի վավերացրել արձանագրությունը, սակայն Բուդապեշտը վստահեցրել է, որ իրենք չեն լինի դաշինքի վերջին անդամ երկիրը, որը կհաստատի այս որոշումը։