Թուրքիան, կարծես, պատրաստ է փոխել իր արտաքին քաղաքականությունը․ Հունաստանի վարչապետ

Չորեքշաբթի օրը Վիլնյուսում ՆԱՏՕ-ի գագաթնաժողովի շրջանակներում Թուրքիայի նախագահ Ռեջեփ Թայիփ Էրդողանի հետ հանդիպմանը Հունաստանի վարչապետ Կիրիակոս Միցոտակիսը տեսել է Անկարայի պատրաստակամությունը փոխելու իր քաղաքականությունը Աթենքի նկատմամբ: Այս մասին Միցոտակիսն ասել է հունական Skai հեռուստաալիքին տված հարցազրույցում, որը հեռարձակվել է հինգշաբթի երեկոյան։

«Երեկ [Էրդողանի հետ] հանդիպումը հնարավորություն էր չորս դժվար տարիներից հետո վերսկսելու հունա-թուրքական հարաբերությունները», - ասել է Միցոտակիսը: «Իմ կարծիքը, որ Թուրքիան, կարծես, պատրաստ է փոխել իր արտաքին քաղաքականությունը, հաստատվել է: Հունաստանը կարող է միայն շահել նման շրջադարձից: Այնտեղ, որտեղ պահանջվում էր, մենք պաշտպանել ենք մեր ինքնիշխանությունն ու ինքնիշխան իրավունքները, բայց ավելի լավ է համերաշխ ապրել: Հուսով եմ, որ այս քաղաքականությունը կունենա շարունակականություն, հետևողականություն և տևականություն»:

Վարչապետի խոսքով՝ «մեծ նպատակ է լուծել առկա վեճի էությունը»։ «Մեր հիմնական վիճելի հարցը, որը դեռ ունենք, ծովային գոտիների սահմանազատումն է [Էգեյան և Արևելյան Միջերկրական ծովում]: Ներգաղթի կառավարումը մեծ խնդիր է կամ բարենպաստ հնարավորություն: Իմ նպատակն է հասնել մեր վեճի հիմնական կետին, և եթե կարողանանք համաձայնվել, ապա գնանք Հաագա, [չնայած] դա հեշտ գործ չէ»,- ասել է Միցոտակիսը։

Վարչապետը ուղղակիորեն չի պատասխանել հաղորդավարների հարցին, թե արդյոք Էրդողանի հետ զրույցում նշվել է «Հաագա» բառը՝ ասելով, որ չի խորանա քննարկումների մեջ և շեշտել է, որ կարևոր է վստահելի հարաբերություններ ունենալ։ «Մենք պետք է բաժակը տեսնենք կիսով չափ լիքը, ոչ թե կիսադատարկ»,- ասել է քաղաքական գործիչը։