ԱՄՆ Հայաստանին օգնելով՝ միայն մեկ նպատակ ունի. Սլուցկի

ԱՄՆ-ն ցանկանում է ընդլայնել աջակցությունը Հայաստանին, որպեսզի Անդրկովկասում ստեղծվի հակառուսական ցատկահարթակ։ Այս մասին սեպտեմբերի 14-ին իր սոցիալական ցանցերում հայտարարել է Պետդումայի միջազգային հարաբերությունների հանձնաժողովի նախագահ Լեոնիդ Սլուցկին։

«Այժմ Վաշինգտոնը պատրաստ է «օգնել» Երևանին՝ ակնհայտորեն երազելով Անդրկովկասում նոր հակառուսական ցատկահարթակ ստեղծելու մասին։ Բայց Ռուսաստանը թուլացնելու նրա բոլոր ծրագրերը մեր աչքի առաջ քանդվում են»,- գրել է պատգամավորը։ Նա հավելել է, որ արտասահմանյան «հովանավորությունը» օգուտ չի բերել աշխարհի ոչ մի երկրի՝ «բերելով միայն անախորժություններ ու վիշտ, արյուն ու ավերածություններ»։ Ահա թե ինչի են հանգեցնում ամերիկյան ոճի «գործընկերությունը» և «զարգացման աջակցությունը» ի վերջո»,- ընդգծել է պատգամավորը։

Սլուցկին հիշեցրել է, որ ժամանակին Արևմուտքը նույնպես «մոտեցել է» Ուկրաինային։ «Եվ այսօր մենք տեսնում ենք արդյունքը՝ Ուկրաինան վերածվել է ԱՄՆ-ի խամաճիկի, սնանկացած՝ ավերված տնտեսությամբ, արտաքին վերահսկողությամբ և կորցրած ինքնիշխանությամբ մի երկրի, որտեղ տասնյակ հազարավոր ուկրաինացիներ իրենց կյանքն են տվել հանուն այլոց շահերի և հավակնությունների»,- գրել է Սլուցկին։

Ավելի վաղ Եվրոպայի  հարցերով պետքարտուղարի օգնականի պաշտոնակատար Յուրի Քիմն ասել էր, որ Միացյալ Նահանգները պետք է հնարավորինս ընդլայնի Հայաստանին աջակցությունը զարգացման, պաշտպանության և անվտանգության ոլորտներում։ Նրա խոսքով, Վաշինգտոնը ռազմավարական հնարավորություն ունի դիմակայելու Ռուսաստանի, Իրանի և Չինաստանի ազդեցությանը տարածաշրջանում։