«Ադրբեջանն ունի բոլոր իրավունքները կանխելու ցանկացած սպառնալիք»․ Բայրամով
Արտաքին Քաղաքական
Ադրբեջանն ունի բոլոր իրավունքները կանխելու ցանկացած սպառնալիք՝ միջազգային իրավունքին համապատասխան, հայտարարել է երկրի արտգործնախարար Ջեյհուն Բայրամովը, հաղորդում է Ինտերֆաքս Ադրբեջանը։
«Ադրբեջանը բոլոր իրավունքներն ունի կանխելու երկրին սպառնացող ցանկացած վտանգ՝ համաձայն միջազգային իրավունքի», - շաբաթ օրը հայտարարել է Բայրամովը Գերմանիայի արտգործնախարար Անալենա Բերբոքի հետ բանակցություններից հետո կայացած ճեպազրույցում։
Բայրամովը գերմանացի գործընկերոջը նաև նկատողություն է արել Շուշի և Ստեփանակերտ տեղանուններն օգտագործելու համար։
«Պետք է հարգանքով վերաբերվել Ադրբեջանին»,- պնդել է նա։
Նա ընդգծել է, որ Ադրբեջանը, ինչպես նախկինում, պատրաստ է Հայաստանի հետ բանակցությունների։ «Բանակցությունները կարող են լինել ցանկացած ձևաչափով, կարևոր է հասկանալ, որ դա Ադրբեջանի և Հայաստանի հարցն է։ (...) Խաղաղության պայմանագրի հետ կապված մենք հայկական կողմին ենք փոխանցել մեր հերթական առաջարկները և այժմ սպասում ենք նրանց պատասխանին»,- հավելել է Բայրամովը։
Ադրբեջանի ԱԳՆ ղեկավարն ընդգծել է, որ Թեհրանում «3+3» ձևաչափով նախարարների հանդիպման ժամանակ իր հայ գործընկեր Արարատ Միրզոյանի հետ քննարկել է հարաբերությունների կարգավորման հարցը։
Ամենադիտված 
Ես ուկրաինական տարածքները կտամ Ռուսաստանին՝ խաղաղության հասնելու համար. Զելենսկի
