Հայաստանն այլեւս օգտագործված սպառազինություն չի ունենալու. Անդրանիկ Քոչարյան

Մեր սպառազինության կառուցվածքը դիվերսիֆիկացվում է: Այս մասին հանրային հեռուստաընկերության եթերում ասել է ԱԺ պաշտպանության եւ անվտանգության հարցերի հանձնաժողովի նախագահ Անդրանիկ Քոչարյանը:

«Այսինքն՝ մեկ աղբյուրի վրա այլեւս ճանապարհ չունենք անցնելու: Մենք փնտրում ենք թե΄ բարեկամներ, թե΄ սպառազինություն, որը հենց բանակի արդիականացման հիմքը նաև կլինի: Պատահական չէ, որ երբ պաշտպանության նախարարը գնում է Ֆրանսիա կամ Հնդկաստան, ազգովի նայում ենք, թե այդ երկրները ինչ սպառազինություն ունեն եւ ինչ կարելի է բերել: Երբ որ Ռուսաստանից մեր պայմանագրով նախատեսված սպառազինությունը մեր երկրում չէ, մենք մտահոգվում ենք՝ բա մեր ռազմավարական, գործընկերային հարաբերությունները ինչու են այս վիճակին եւ, բայց դա չի նշանակում, որ մենք անելիքներ չունենք մեր դաշնակիցների հետ, որպեսզի օր առաջ մենք մեր կարիքները կարողանանք հոգալ»,- ասաց նա:

Քոչարյանը նշում է, որ գործող իշխանությունները արձանագրում են՝ Հայաստանն այլեւս  օգտագործված սպառազինություն չի ունենալու. «Եթե ձեռք ենք բերում սպառազինություն՝ դա պետք է լինի նոր և արդիական և այդ ուղղությամբ լայնածավալ աշխատանքներ է իրականացնում պաշտպանական գերատեսչությունը ոչ միայն գերժամանակակից բնագծերի ստեղծման, այլ նաեւ դրանց կահավորման եւ կառավարման ուղղությամբ: Դա նպատակ ունի ոչ թե հարձակողական բնույթի գործողություններ իրականացնելու, այլ մեր երկրի սահմանները անառիկ պահելու առումով և պատահական չէ, որ այդ ամենը արվում է խաղաղությունն օր առաջ իրականություն դարձնելու համար»: