«Շնորհակալ եմ Ձեր վերաբերմունքի համար». ԿԳՄՍ նախարարը հրաժեշտի հանդիպում է ունեցել ՀՀ-ում Ճապոնիայի դեսպանի հետ

ՀՀ կրթության, գիտության, մշակույթի և սպորտի նախարար Ժաննա Անդրեասյանն այսօր ընդունել է Հայաստանի Հանրապետությունում Ճապոնիայի արտակարգ և լիազոր դեսպան Ֆուկուսիմա Մասանորիին՝ Հայաստանում նրա դիվանագիտական առաքելության ավարտի կապակցությամբ:

ԿԳՄՍ նախարարը շնորհակալություն է հայտնել դեսպանին պաշտոնավարման ընթացքում հայ-ճապոնական բարեկամական հարաբերությունների ամրապնդման ու համագործակցության արդյունավետության բարձրացման ուղղությամբ ներդրած ջանքերի համար և մաղթել հաջողություններ հետագա աշխատանքային գործունեության մեջ:

«Իսկապես շատ գնահատելի են այն ջանքերը, որոնք Դուք ներդրեցիք կրթության, մշակույթի և մեր մյուս ոլորտներում համագործակցության զարգացման առումով: Այդ համագործակցության արդյունքում մեր որոշ դպրոցներում ու մանկապարտեզներում հիմա ունենք ավելի բարեկարգված պայմաններ, նոր գույք. բազմաթիվ արդյունավետ ծրագրեր կան, որոնք իրականացնում ենք միասին: Իհարկե, հայ-ճապոնական հարաբերությունների խորացման ավելի մեծ ներուժ է առկա, բայց վստահ եմ՝ Ձեր պաշտոնավարմամբ Դուք էապես նպաստեցիք դրանց զարգացմանը»,- ասել է ԿԳՄՍ նախարարը:

Ժաննա Անդրեասյանն ընդգծել է դեսպան Մասանորիի՝ հայերենի հանդեպ ունեցած գնահատանքը՝ լեզուն ուսումնասիրելու և տիրապետելու առումով. «Սա անձնապես հիացմունքի է արժանի: Շնորհակալ եմ Ձեր վերաբերմունքի համար»:

Ճապոնիայի արտակարգ և լիազոր դեսպան Ֆուկուսիմա Մասանորին շնորհակալություն է հայտնել ջերմ ընդունելության համար և ընդգծել՝ Հայաստանը հարուստ պատմություն և մշակութային ժառանգություն ունեցող երկիր է, որտեղ դիվանագիտական գործունեություն ծավալելը մեծ պատիվ է եղել:

«Հայաստանը հիանալի երկիր է: Լինելով Հայաստանի տարբեր մարզերում՝ հանդիպել եմ շատ տաղանդավոր դպրոցականների, որոնք, անկասկած, ձեր երկրի ապագան են: Հայաստանի կրթական համակարգում իրականացվող բարեփոխումները, հավատացած եմ, կնպաստեն նաև երկրի էական զարգացմանը: Ճապոնիայի կառավարության համար Հայաստանը կարևոր գործընկեր է, այդ իսկ պատճառով Հայաստանի հետ համագործակցությունն ու տարբեր ոլորտներում իրականացվող նախագծերը լինելու են շարունակական: Ճապոնիայի կառավարությունը շարունակելու է նպաստել Հայաստանի կառավարության կողմից իրականացվող դպրոցաշինության և վերակառուցման աշխատանքներին, ինչպես նաև իրականացնելու է Լեռնային Ղարաբաղից բռնի տեղահանված բնակիչների կարիքների գնահատման ու ֆինանսական աջակցության ծրագրեր»,- նշել է դեսպանը:

Նախարարը շնորհակալություն է հայտնել Ճապոնիայի կառավարությանը ոչ միայն ֆինանսական աջակցության, այլև Լեռնային Ղարաբաղի խնդրի՝ տարբեր հարթակներում քննարկումների ժամանակ ցուցաբերած սկզբունքային և հետևողական մոտեցման համար: ԿԳՄՍ նախարարն իր խորին մտահոգությունն է հայտնել Լեռնային Ղարաբաղի տարածքում հայկական մշակութային ժառանգության պահպանության կապակցությամբ և հույս հայտնել, որ միջազգային կառույցները, իրենց մանդատը կիրառելով, գործուն քայլեր կձեռնարկեն փաստահավաք առաքելության իրականացման ուղղությամբ՝ կանխարգելելու վանդալիզմի դեպքերը, որոնց հավանականությունը 2023 թվականի բռնի տեղահանումներից հետո ավելի մեծ է: Ժաննա Անդրեասյանը նշել է, որ 2023 թվականի սեպտեմբերի 19-ից՝ Լեռնային Ղարաբաղի բնակիչների բռնի տեղահանումից հետո, ոչնչացման վտանգի տակ են հայտնվել առավել մեծ թվով պատմամշակութային հուշարձաններ, որոնց թվում են համաշխարհային քրիստոնեական մշակույթի կարևորագույն նմուշներից Գանձասարը և Ամարասը:

Հանդիպման ընթացքում քննարկվել են նաև երկկողմ հետաքրքրություն ներկայացնող այլ հարցեր: Հայաստանի Հանրապետությունում Ճապոնիայի արտակարգ և լիազոր դեսպան Ֆուկուսիմա Մասանորին հայտնել է, որ դիվանագիտական առաքելության ավարտից հետո մտադիր է շարունակել հայ-ճապոնական հարաբերությունների զարգացմանն ուղղված գործունեությունը, ինչը, դեսպանի գնահատմամբ, կնպաստի Հայաստանի առավել լայն հանրահռչակմանը Ճապոնիայում: