ԱՄՆ-ի պատմության մեջ առաջին անգամ դատապարտյալը մահապատժի կենթարկվի՝ ազոտ շնչելով

Մաքուր ազոտով աշխարհում առաջին մահապատիժը նախատեսվում է իրականացնել ԱՄՆ-ում` հունվարի 25-ին, հայտնել է NBC հեռուստաալիքը։

Այդ օրը 58-ամյա Քենեթ Յուջին Սմիթը, որը դատապարտվել է պայմանագրային սպանության համար, պետք է դիմակ կրի, որի մեջ մաքուր ազոտ կմատակարարվի, ինչի հետևանքով՝ նա մի քանի րոպեի ընթացքում կմահանա հիպոքսիայից:

Այս մեթոդը թույլատրված է երեք նահանգներում, սակայն գործնականում երբեք չի կիրառվել։ Այդ պատճառով՝ Սմիթի փաստաբանները կրկին ու կրկին բողոքում են իրենց հաճախորդի նկատմամբ «նորարարության» կիրառման դեմ և մտադիր են մինչև Գերագույն դատարան գնալ: Նրանք անընդունելի են համարում նման փորձերը մարդկանց վրա, բացի այդ, ըստ նրանց, դատապարտյալը չի ​​կարողանա դիմակ կրելով աղոթել։

Ըստ Ալաբամայի գլխավոր դատախազության՝ այս փաստարկները ենթադրություններ են։ «Անմեղ կնոջ՝ Էլիզաբեթ Սենեթի նողկալի պայմանագրային սպանության մեջ մեղավոր ճանաչվելուց հետո Քենեթ Սմիթը գրեթե 35 տարի խուսափել է մահապատժից», - ասել է նահանգի գլխավոր դատախազ Սթիվ Մարշալը:

Քենեթ Յուջին Սմիթը մահապատժի է դատապարտվել քարոզչի կնոջ սպանության համար, որը նա և հանցակիցը կատարել են 1988 թվականին՝ նրա ամուսնու անունից: 2022 թվականին նրան փորձել են մահապատժի ենթարկել մահացու ներարկումով, սակայն չի հաջողվել երակը գտնել, և մահապատիժը հետաձգվել է։