Բոլորին կվերադարձնենք այնտեղ, որտեղից եկել են. Թրամփը խոստացել է ԱՄՆ-ից արտաքսել միգրանտներին

ԱՄՆ նախկին նախագահ Դոնալդ Թրամփը խոստացել է՝ եթե հաղթի 2024 թվականի նախագահական ընտրություններում, կսկսի պատմության մեջ ԱՄՆ-ից անօրինական միգրանտների ամենամեծ արտաքսումը։

«Մենք այստեղ միլիոնավոր մարդիկ ունենք: Տեսե՞լ եք, թե ինչ է կատարվում Նյու Յորքում, որտեղ նրանք հասարակ ուսանողներին դուրս էին հանում դպրոցներից և նրանց փոխարեն միգրանտներ էին բերում: Մենք բոլորին կվերադարձնենք այնտեղ, որտեղից եկել են», - ասել է նա Այովայում, հայտնում է Fox News-ը։

Նախկինում Թրամփը բազմիցս քննադատել է նախագահ Ջո Բայդենի ներկայիս վարչակազմը, այդ թվում՝ նրա միգրացիոն քաղաքականության պատճառով։ Մասնավորապես, Թրամփը կարծիք է հայտնել, որ Բայդենի օրոք ԱՄՆ-ը վերածվել է աղբավայրի, և ամերիկյան քաղաքները լցվել են անօթևաններով, թմրամոլներով և հանցագործներով։

ԱՄՆ նախագահական ընտրությունները նշանակված են 2024 թվականի նոյեմբերին։