«Եթե չլինի Վարդան Ղուկասյանը` «Հանրային ձայնը» կգնա պատմության աղբանոցը»

««Հանրային ձայն» կուսակցության որոշ անդամներ` Արտակ Գալստյանը, նրա կինը, եղբայրը, ևս մի երկու հոգի որոշել են պառակտել կուսակցությունը, քանի որ, ինչպես հասկանում եմ, ընտրությունները մոտ են։ Բայց քանի որ իշխանության մեջ շատ են անգրագետները ու ոչ իրենց գործի գիտակ մարդիկ, Արտակ Գալստյանի ձեռքով գործընթացը սկսեցին ավելի շուտ։ Ես մի քանի ամիս համբերեցի՝ անկախ նրանից, որ իմացա Արտակ Գալստյանը կեղծ տվյալներ է ներկայացրել և ոստիկան չի եղել, գնդապետ չէ, մասնագիտական կրթություն չունի, հայրը չեկիստ չի, ինչպես նշել է ԱԱԾ-ում, այլ կակեբեիշնիկի տղա է»,- այս մասին ԼՈՒՐԵՐ.com-ի հետ զրույցում ասաց Վարդան Ղուկասյանը՝ անդրադառնալով «Հանրային Ձայն» կուսակցության կառավարման խորհրդի հայտարարությանը։

Նրա խոսքով՝ կուսակցության հիմնադրման հիմքում եղել է Վարդան Ղուկասյանը. «Չլինի Վարդան Ղուկասյանը, չի լինի «Հանրային Ձայն» կուսակցութունը: Ո՞վ է տեսել ՔԿՀ-ում համագումար անեն․ Վարդան Ղուկասյանով հայտնի են դարձել, իմ հաղորդման համանուն անունով կուսակցություն են բացել, մեկ էլ իմ թիկունքում խաղեր են տալիս։ 
Արտակ Գալստյանը իր նեղ անձնական կազմով կեղծ արձանագրություն է կազմել, թե իմ լիազորությունները դադարեցված են, քանի որ ՌԴ քաղաքացի եմ»,-նշեց նա:

Ղուկասյանն ընդգծեց՝ հունվարի 19-ի համագումարը տեղի է ունենալու. «Համագումարին կտեսնենք` ում լիազորությունները կդադարի։ Եթե իմ լիազորությունները դադարի ես կասեմ հաջողություն և կստեղծեմ ավելի հզոր կուսակցություն, իսկ «Հանրային ձայն»-ը, առանց Վարդան Ղուկասյանի, դառնալու է զուգարանի թուղթ, քանի որ առանց ինձ չեն կարողանալու ձայն հավաքել։ Ինձ համար կապ չունի՝ ինչ հարթակով հանդես կգամ, կլինի «Դոգ» դաշինք, «Վարդան Ղուկասյան» դաշինք, թե այլ բան, ոչ մի տարբերություն։ Իսկ Հանրային ձայնը կգնա պատմության աղբանոցը․ այստեղ հարցը Վարդան Ղուկասյան լոգոն է, դեմքը»,- եզրափակեց Ղուկասյանը:

Հիշեցնենք՝ «Հանրային Ձայն» կուսակցության կառավարման խորհուրդը հայտարարություն էր տարածել, որով դադարեցված են համարել Վարդան Ղուկասյանի անդամությունը կուսակցությանը՝ նշելով, որ որոշման հիմքը Վարդան Ղուկասյանի՝ ՌԴ քաղաքացիություն ունենալն է։