Եթե Ադրբեջանը նահանջում է խաղաղության օրակարգից, դա չի նշանակում, որ մենք էլ պետք է հրաժարվենք. Փաշինյան

Ուզում եմ հասկանալ՝  ի՞նչ հույսով եք Դուք երկու տարի շարունակ հայտարարում յուրաքանչյուր դեկտեմբեր ամսին ավելի ջանասիրությամբ, որ մոտ է «խաղաղություն» կոչվող  պայմանագրի ստորագրումը: Այս մասին այսօր՝ հունվարի 17-ին, ԱԺ-ում հարցուպատասխանի ժամանակ նշեց «Հայաստան» խմբակցության պատգամավոր Քրիստինե Վարդանյանը՝ դիմելով վարչապետ Նիկոլ Փաշինյանին:

Նա հիշեցրեց, որ նախորդ  տարի դեկտեմբերի 14-ին Փաշինյանը հայտարարեց, որ Հայաստանն ու Ադրբեջանը համաձայնության են եկել 3 հիմնական սկզբունքների շուրջ այն ըմբռնմամբ, որ ՀՀ տարածքը 29 800 քկմ է։

«Ես ծանոթացել եմ առաջարկներին և ասում եմ՝ այդ առաջարկներում չկա որևէ կետ, որով Ադրբեջանը ճանաչում է Հայաստանի 29 800 քառակուսի կմ-ն։ Ավելին՝ հրաժարվում է դուրս գալ 200 քառակուսի կմ օկուպացված տարածքներից։

Ասում եք՝ Ադրբեջանը համաձայնել է դելիմիտացիա իրականացնել Ալմա Աթայի համաձայնագրի հիման վրա։ Սուտ է, չկա նման կետ՝ առնվազն այն առաջարկներում, որոնք մենք տեսել ենք։ Ասում եք՝ Ադրբեջանի և Հայաստանի միջև խաղաղության պայմանագրի շուրջ բանակցություններ տարածաշրջանի կոմունիկացիաները կողմերի ինքնիշխանության և լիազորությունների հիման վրա պետք է բացվեն։ Ալիևն այս կետին ամբողջությամբ պատասխանել է։

Հիմա ուզում եմ հասկանալ՝ որևէ սկզբունքային հարցի շուրջ որևէ համաձայնություն չկա, մեր խեղճ ժողովրդին՝ պատերազմներից ու կորուստներից հոգնած, անընդհատ խաղաղության տեսիլքով խաբելը ինչքա՞ն պետք է շարունակվի»,- ասաց Վարդանյանը:

Փաշինյանն էլ ասաց․ «Ես չեմ հիշում՝ անոնս արած լինենք, որ խաղաղության պայմանգիր ենք ստորագրում։ Ասել եմ՝ կա հավանականություն, պրոցեսներ կան: Ուզում եմ ձեր զարմացած հայացքներին արձագանքել հետեւյալով, որ 2011-ին տեքստը համաձայնեցված է եղել, ինչպես Սերժ Սարգսյանն է ասել իր հարցազրույցում, միջազգային լիդերները զանգել են, համարյա շնորհավորել են, քաջալերել են: Էդ ինչի՞ եք զարմացած:

Մենք խաղաղության օրակարգից չենք հրաժարվել, չենք հրաժարվում և չենք հրաժարվելու: Սա շատ կարևոր արձանագրում է, որովհետև մեր քաղաքական տեսլականը դա է, և դա շարունակելու ենք, որովհետև մենք Ադրբեջանի տրամաբանությամբ չենք հռչակել խաղաղության օրակարգը: Մենք մեր տրամաբանությամբ ենք հռչակել խաղաղության օրակարգը, իհարկե, այն ըմբռնմամբ, որ խաղաղությունը միակողմանի գործողություն չէ:

Բայց եթե, օրինակ՝ Ադրբեջանը նահանջում է խաղաղության օրակարգից, դա չի նշանակում, որ մենք էլ պետք է հրաժարվենք: Ընդհակառակը, կարող է մենք ավելի շատ շեշտադրումներ անենք, ավելի խորը պետք է հիմնավորենք, ավելի շատ պետք է փաստարկենք»,- ասաց վարչապետը: