Վաղաժամ ծնված աղջնակի մոտ 4 երիկամ է հայտնաբերվել (լուսանկար)

Բրազիլիայում չորս երիկամներ ունեցող աղջիկ է ծնվել։ Այս մասին հայտնում է The New York Post-ը։

Բժիշկները պարզել են, որ Իզիս Էլոա Ֆերեյրա Ալվեսը երիկամների հետ կապված խնդիրներ ունի, երբ դեռ մոր՝ 21-ամյա Թալիա Սիլվա Ալվեսի արգանդում էր։ Աղջիկը ծնվել է վաղաժամ՝ կեսարյան հատումով և որոշ ժամանակ անցկացրել ինկուբատորում՝ բժիշկների հսկողության ներքո։ Հինգերորդ ամսում Իզիսը վիրահատության ենթարկվեց, որի ընթացքում էլ բժիշկները պարզեցին, որ նա չորս երիկամ ունի։

Վիրաբույժները հեռացրել են աղջկա երիկամներից մեկը, քանի որ այն մեծացել էր և ճնշում էր ստամոքսն ու աղիները՝ դժվարացնելով սննդի մարսումը: Վիրահատությունից հետո Իզիսը մնացել է երեք երիկամով, որոնցով նա ապրում է մինչ օրս։ Նշվում է, որ աղջիկը չի կարող լրացուցիչ օրգանի դոնոր դառնալ, քանի որ խնդիրներ ունի արյունատար անոթների հետ կապված, ինչը կբարդացնի փոխպատվաստումը։

Իզիսին վիրահատած ուրոլոգի խոսքով՝ նա դեռ երկար պետք է գտնվի բժիշկների հսկողության տակ՝ հետագայում հնարավոր առողջական խնդիրներից խուսափելու համար։ Այժմ աղջիկը 13 ամսական է։ Նա հաճախ է հոսպիտալացվում թոքաբորբի պատճառով, որն առաջանում է գրիպի ֆոնին։  Չնայած դրան, ըստ Թալիայի, դուստրը զարգանում նույն արագությամբ, ինչ մյուս երեխաները։