Պուտինը շնորհավորել է Ալիևին

Ադրբեջանի և Ռուսաստանի Դաշնության նախագահներ Իլհամ Ալիևը և Վլադիմիր Պուտինը հեռախոսազրույց են ունեցել, որի ընթացքում` Պուտինը շնորհավորել է Ալիևին նախագահական ընտրություններում տարած հաղթանակի կապակցությամբ, գրում է Interfax-ը։

Ալիևը շնորհակալություն է հայտնել Պուտինին ուշադրության և շնորհավորանքների համար։

«Պետությունների ղեկավարները վստահություն են հայտնել, որ երկու երկրների միջև դաշնակցային և ռազմավարական գործընկերային հարաբերությունները կշարունակեն զարգանալ տարբեր ոլորտներում, ինչպես նաև քննարկել են համագործակցության հեռանկարներին վերաբերող հարցեր»,- ասված է Ադրբեջանի նախագահի մամուլի ծառայության հաղորդագրության մեջ։

Փետրվարի 7-ին Ադրբեջանում տեղի են ունեցել արտահերթ նախագահական ընտրություններ։ ԿԸՀ-ի տվյալներով՝ քվեաթերթիկների 93,35%-ը մշակելուց հետո գործող նախագահ Ալիևը հավաքել է ձայների 92,05%-ը։ Ընտրություններին մասնակցությունը կազմել է 76,73%։