Բլինկենը զգուշացրել է Նեթանյահուին

ԱՄՆ-ն Իսրայելին է փոխանցել իր տեսակետը, որ Գազայի հատվածում պաղեստինցի խաղաղ բնակիչների շրջանում զոհերը չափազանց մեծ են։ Այս մասին Թել Ավիվում կայացած մամուլի ասուլիսում հայտարարել է ԱՄՆ պետքարտուղար Անտոնի Բլինկենը, գրում է ՏԱՍՍ-ը։

«Այնուամենայնիվ, ինչպես ես այսօր ասացի վարչապետ Բենիամին Նեթանյահուին և Իսրայելի մյուս առաջնորդներին, նրա ռազմական գործողությունների հետևանքով՝ քաղաքացիական բնակչության շրջանում զոհերի թիվը չափազանց մեծ է», - ասել է Բլինկենը:

ԱՄՆ պետքարտուղարը նաև ասել է, որ Իսրայելի ղեկավարությանը փոխանցել է որոշ քայլեր, որոնք նա պետք է ձեռնարկի Գազայի հատվածի բնակիչներին անհրաժեշտ մարդասիրական օգնություն ստանալու համար։ Նրա խոսքով՝ Իսրայելը պետք է մարդասիրական օգնության մուտքը բացի անկլավի հյուսիսում, «որտեղ հազարավոր մարդիկ փորձում են գոյատևել դժվարին պայմաններում»։ «Նա պետք է ապահովի Հորդանանից հումանիտար օգնության հոսքը: Նա պետք է ուժեղացնի հակամարտությունների կանխարգելմանն ուղղված ջանքերը և բարելավի համակարգումը մարդասիրական օգնություն տրամադրողների հետ, և ապահովի, որ փրկարար օգնության առաքումը Գազա որևէ մեկի կողմից չարգելափակվի որևէ պատճառով»,- ընդգծել է պաշտոնյան։

Պետքարտուղարը նաև ասել է, որ Իսրայելի ղեկավարությանը հայտնել է իր խորը մտահոգությունը՝ կապված իր պաշտոնյաների հռետորաբանության հետ, ինչը հանգեցնում է հետագա էսկալացիայի։
«Իսրայելի վարչապետ Բենիամին Նեթանյահուի և բարձրաստիճան պաշտոնյաների հետ զրույցներում ես մեր խորը մտահոգությունն եմ հայտնել գործողությունների և հայտարարությունների առնչությամբ, որոնք մեծացնում են լարվածությունը, խաթարում միջազգային աջակցությունը և լրացուցիչ բեռ են ստեղծում անվտանգության խնդրի վրա»,- ասել է Բլինկենը: