Ադրբեջանցի գործընկերների հետ շարունակում ենք քննարկել զորքերի հայելային հետքաշման հարցը․ Արմեն Գրիգորյան

Այսօր լրագրողների հետ ճեպազրույցի ընթացքում  Անվտանգության խորհրդի քարտուղար Արմեն Գրիգորյանը անդրադարձել է Ադրբեջանի կողմից նոր թափով զենք-զինամթերքի ձեռքբերմանը․

«Ադրբեջանի ձեռք բերած սպառազինությունը տարածաշրջանը կայունացնելու համար չէ։ Մենք առաջարկել ենք, որ սպառազինության վերահսկման մեխանիզմներ ունենանք, որովհետև կարծում ենք՝ սպառազինության վերահսկումը կարող է տարածաշրջանում կայունության և երկարատև խաղաղության հաստատման գործընթաց լինել, և մենք շարժվում ենք այս օրակարգով»։

ԱԽՔ-ը նաև պատասխանել է ադրբեջանական և հայկական զորքերի հայելային հետքաշմանը վերաբերող հարցերին․

«Փորձելու ենք Ադրբեջանի հետ այդ հարցում հասնել համաձայնության, մենք միանշանակ համոզված ենք, որ զորքերի հայելային հետքաշումը նույնիսկ միջադեպեր թույլ չտալու լավագույն գործիքներից մեկն է։ Այսինքն՝ որոշակի հեռավորության վրա եթե դասավորվեն Զինված ուժերն ու սահմանապահ զորքերը տեղակայվեն ամբողջ սահմանի երկայնքով, բնականաբար, դա կլինի կայունության գործոն»,- ընդգծեց նա։

Լրագրողի հարցադրմանը՝ ո՞րն է Ադրբեջանի կողմից այս առաջարկության մերժման նպատակը, Գրիգորյանն ասաց, որ դժվարանում է պատասխանել.

«Կդժվարանամ հիմնավորել, կարող են տարբեր տարբերակներ լինել, բայց մեր օրակագում սա հարց է, որը շարունակում ենք քննարկել ադրբեջանցի գործընկերների հետ»,- թեմայի վերաբերյալ իր խոսքն ամփոփեց Անվտանգության խորհրդի քարտուղարը։