Ուկրաինան նոր ԱԳ նախարար ունի

Ուկրաինայի արտաքին գործերի նախարարի առաջին տեղակալ Անդրեյ Սիբիգան դարձել է երկրի արտաքին քաղաքականության դեպարտամենտի ղեկավարը։ Այս մասին Telegram-ի իր ալիքում գրել է Գերագույն Ռադայի պատգամավոր Յարոսլավ Ժելեզնյակը։

Նա հայտնել է, որ խորհրդարանում քվեարկության ժամանակ 258 պատգամավոր կողմ է քվեարկել Սիբիգային արտաքին գործերի նախարարության ղեկավարի պաշտոնում նշանակելուն։ Ընդ որում, ոչ ոք դեմ չի արտահայտվել այս նախաձեռնությանը, սակայն 28 օրենսդիրներ որոշել են ձեռնպահ քվեարկել։

Սեպտեմբերի 3-ին Դմիտրի Կուլեբան, ով 2020 թվականից գլխավորում է Ուկրաինայի ԱԳՆ-ն, հրաժարականի դիմում է ներկայացրել։  Երկու օր անց օրենսդիրները հավանություն են տվել ԱԳՆ ղեկավարի պաշտոնանկությանը։

Ուկրաինայի նախագահ Վոլոդիմիր Զելենսկին Գերագույն Ռադային է ներկայացրել արտաքին գործերի նախարարի թեկնածությունը։ Երկրի ղեկավարն այս պաշտոնում առաջարկել է Սիբիգային։