Գետարգել գյուղում այսօր տեղի կունենա հրազենային վիրավորումից մահացած ժամկետային զինծառայողի հոգեհանգստի արարողությունը

Կոտայքի մարզի Գետարգել գյուղում այսօր տեղի կունենա սեպտեմբերի 2-ին, Սիսիանի զորամասերից մեկում հրազենային վիրավորումից մահացած Էդգար Ալեքսանյանի հոգեհանգստի արարողությունը։ Այս մասին այսօր՝ սեպտեմբերի 4-ին, NEWS.am–ին հայտնեց Գետարգելի վարչական ղեկավար Սամվել Թորոսյանը։

«Էդգարը 18 տարեկան էր, ձմռանն էր զորակոչվել բանակ։ Ընտանիքի կրտսեր զավակն էր, իրենից մեծ մի եղբայր ունի։ Խելոք, համեստ ընտանիք են, գյուղի բնակիչների հարգանքն են վայելում։ Արդեն 3-րդ օրն է՝ ուշքի չենք գալիս այդ լուրից»,– պատմեց գյուղի վարչական ղեկավարը։

NEWS.am–ի հետ զրույցում գյուղի բնակիչները պատմեցին, որ ընտանիքի անդամները չեն հավատում ինքնասպանության վարկածին, քանի որ նախորդ օրը երեկոյան զրուցել են Էդգարի հետ և ոչ մի արտասովոր բան չեն նկատել։

Ավելի վաղ հայտնել էինք, որ զինծառայող Էդգար Ալեքսանյանին ինքնասպանության հասցնելու մեղադրանքով կալանավորվել է վերջինիս ծառայակիցը:

ՀԻշեցնենք, որ սեպտեմբերի 2-ին՝ ժամը 10:10-ի սահմաններում, ՀՀ ՊՆ N զորամասի պահպանության գոտու մարտական դիրքում հայտնաբերվել էր զինծառայող Էդգար Ալեքսանյանի դին՝ կզակի շրջանում հրազենային վնասվածքով։