Զելենսկին հայտնել է՝ ինչպես են ստիպելու Պուտինին գալ բանակցությունների

Ուկրաինան անժամկետ կպահի Կուրսկի շրջանի` օգոստոսին օկուպացված տարածքները, որպեսզի ստիպի Վլադիմիր Պուտինին արագ գալ սեղանի շուրջ բանակցությունների։ Այս մասին NBC News-ի եթերում հայտարարել է Ուկրաինայի նախագահ Վոլոդիմիր Զելենսկին։

Պետության ղեկավարը նշել է, որ ռուսական տարածքների պահպանումը պատերազմի ավարտի ծրագրի անբաժանելի մասն է։ Կիևը շուտով կներկայացնի այս ծրագիրը իր դաշնակիցներին, այդ թվում՝ Վաշինգտոնին։ «Այս պահին (Կուրսկի շրջանի տարածքը մեզ անհրաժեշտ է»,-հավելել է Զելենսկին:

Զելենսկին չի պատասխանել լրագրողի այն հարցին, թե արդյո՞ք Ուկրաինան պատրաստվում է ավելի շատ ռուսական հողեր գրավել։ «Կներեք, ես չեմ կարող խոսել այդ մասին: Սա նման է մեր Կուրսկի գործողության մեկնարկին»,- ասել է Ուկրաինայի նախագահը։ Միաժամանակ, նա ընդգծել է, որ հաջողությունը անսպասելության մեջ է։

Ուկրաինայի Զինված ուժերը, որոնք օգոստոսի 6-ին անսպասելի և արագ հարձակում են սկսել Կուրսկի շրջանում, ներկայումս վերահսկում են շրջանի մոտ 1300 քառակուսի կիլոմետր տարածքի և 100 բնակավայրի վրա: Օգոստոսի 29-ին հայտնի դարձավ, որ ուկրաինացի զինվորականները շրջափակման մեջ են վերցրել մոտ 3000 ռուս զինվորականի։