BRICS-ին Թուրքիայի միանալու վերաբերյալ քննարկումները շարունակվում են. ԶԼՄ

Թուրքիայի իշխող «Արդարություն և զարգացում» կուսակցության ներկայացուցիչ Օմեր Չելիքը, մեկնաբանելով BRICS-ին երկրի հայտի մասին մամուլում հայտնված հաղորդագրությունները, ասել է, որ այդ կազմակերպությանն անդամակցելու վերաբերյալ քննարկումները շարունակվում են, սակայն դեռևս առաջընթաց չկա։

Ավելի վաղ Bloomberg-ը, վկայակոչելով իր աղբյուրներին, հայտնել էր, որ Թուրքիան պաշտոնական հայտ է ներկայացրել BRICS-ին միանալու համար։

«Մեր նախագահը (Թայիփ Էրդողանը-խմբ.) բազմիցս հայտարարել է, որ մենք ցանկանում ենք դառնալ BRICS-ի անդամ։ Եթե այս ուղղությամբ շոշափելի առաջընթաց լինի, մենք այդ մասին կկիսվենք ձեզ հետ, մինչդեռ շոշափելի առաջընթաց չկա: Մեր նախագահն ասել է, որ Թուրքիան ցանկանում է անդամակցել կարևոր հարթակներին, այդ թվում՝ BRICS-ին», - ասել է Չելիքը։