Հայկուհի Գեոկչյան. Կրծքագեղձի քաղցկեղի չորրորդ փուլում հայտնաբերման դեպքերը խիստ նվազել են

Ամբողջ աշխարհում հոկտեմբերը կրծքագեղձի քաղցկեղի իրազեկման ամիսն է։ Հայաստանը միացել է արշավին, այս ամսվա ընթացքում ԱՆ մասնագետները կխոսեն կրծքագեղձի քաղցկեղի կանխարգեկման, բաղ հայննաբերման կարևորության, բուժման, շարունակական հսկողության մասին։

Առողջապահության նախարարության բժշկական օգնության քաղաքականության վարչության պետ Քնար Ղոնյանն այս առումով կարևորեց 2021-ին չորս մարզերում իրականացրած,  այսօր Գեղարքունիքում իրականացվող սքրինինգային ծրագրի իրականացումը։

«Եթե 2021-ին մեկնարկած ծրագրում տարիքային շեմ էր ընտրված 50-69 տարեկանը, ապա այսօր Գեղարքունիքում այս սեպտեմբերից մեկնարկած ծրագրի շրջանակում տարիքային այդ շեմը նվազել է, և 45-68 տարեկան կանայք անվճար՝ պետության կողմից փոխհատուցվող ծառայությունների շրջանակում անցնում են կրծքագեղձի վաղ հայտնաբերման սքրինինգային ծրագիրը»,-ասաց Ղոնյանը, նշելով, որ դրա շնորհիվ հիվանդությունը վաղ է ախտորոշվում, դա էլ բերում է բարելավված արդյունքների ու մահացության ցուցանիշի նվազման։

Նա հիշեցրեց, որ այս պահին շարժական մամոգրաֆը գտնվում է Գեղարքունիքի մարզի Վարդենիս համայնքում։

«Վարդենիս համայնքի բոլոր այն կանայք, որոնք 45-68 տարեկան են, հորդորում ենք ակտիվորեն մասնակցել սքրինինգային ծրագրին։ Հետազոտության, բուժման ողջ շղթան մատուցվում է անվճար պետության կողմից»,-ասաց վարչության պետը՝ մանրամասնելով, որ հետազոտության մեկնարկը տրվում է ԱԱՊ թերապևտին կամ ընտանեկան բժշկին այցելելուց։

Ասուլիսի մասնակից ԱՆ ուռուցքաբանության գծով խորհրդատու Հայկուհի Գեոկչյանը տխոր վիճակագրություն ներկայացրեց, յուրաքանչյուր տարի կրծքագեղձի քաղցկեղ է ախտորոշվում 1000-1500 կանանց մոտ, ինչպես աշխարհում, այնպես էլ Հայաստանում այս հիվանդությունը մահացության ամենատարածված պատճառների թվում է։

«Կանանց իրազեկման, սքրինինգային ու այլ  ծրագրերի շնորհիվ վաղ հանտանբերման ցուցանիշը բավականին մեծացել է։ Եթե հինգ տարի առաջ մենք կրծքագեղձի քաղցկեղը չորրորդ փուլում հայտնաբերում էինք 30-35 տոկոս դեպքերում, ապա հիմա այդ շեմը հիմա իջել է մինչև 15 տոկոս»,-ասաց Գեոկչյանը։

Խոսելով կրծքագեղձի կանխարգելման միջոցների մասին՝ բանախոսն ընդգծեց առողջ, ակտիվ ապրելակերպը, նախաքաղցկեղային հիվանդությունների  վաղ հայտնաբերումն ու բուժումը, ինչը նշանակում է, որ կինը 30 տարեկանից հետո ամեն տարի պետք է անցնի սոնոգրաֆիկ հետազոտությունը։

Նա նաև նշեց, որ հիվանդության առաջացմանը կարող է նպաստել գիրությունը, ալկոհոլի օգտագործումը, ժառանգականությունը։

«Այն կանայք, որոնց առաջին կարգի հարազատի՝ մոր, քրոջ, հորաքրոջ, մորաքրոջ մոտ ախտորոծբել է կրծքագեղձի քաղցկեղ, շատ ավելի ուշադիր պետք է լինեն իրենց առողջության նկատմամբ»,-ասաց Հայկուհի Գեոկչյանը։