Նախագահը մի «փիս խասյաթ» ունի, շատ հաճախ ճիշտ է դուրս գալիս. Լևոն Զուրաբյան

Հայաստանում իշխանությունների վարած արտաքին և ներքին քաղաքականությունը բերել է բազմաթիվ նոր մարտահրավերներ։ Քաղաքական ուժերի պասիվության արդյունքում փողոցային պայքարի է դուրս եկել Հայ Առաքելական եկեղեցու հոգևորականը, ով ամիսներ շարունակ փողոցում է և պայքարում է փաշինյանական իշխանության վարած զիջողական քաղաքականության դեմ։

Euromedia24 միջազգային մեդիայի հարցերին պատասխանել է «Հայ Ազգային Կոնգրես» կուսակցության փոխնախագահ Լևոն Զուրաբյանը։

- Կիրանցից սկիզբ առաջ շարժումը իր պայքարն է շարունակում Երևանում և «Հայ Ազգային Կոնգրեսը» կարծես լուսանցքում է գտնվում և չի մասնակցում քաղաքական պրոցեսներին, ի՞նչն է խնդիրը, որ ՀԱԿ–ը չի մասնակցում այդ համազգային շարժմանը։

- Լուսանցք բառը ես չէի գործածի, եթե ինչ-որ քաղաքական ուժեր զբաղվում են ինչ-որ գործունեությամբ և մենք դրանց չենք մասնակցում, որին մենք չենք մասնակցում, դա չի նշանակում, որ մենք գտնվում ենք լուսանցքում։ Ինչ վերաբերվում է մեր գործունեությանը, ապա մենք շատ լավ հասկանում ենք, թե խնդիրը ինչի մեջ է, մենք շատ լավ հասկանում ենք, թե ինչ ճգնաժամի մեջ է գտնվում Հայաստանը, և մենք հասկանում ենք, որ այդ ճգնաժամից Հայաստանը դուրս հանելու համար, Փաշինյանի իշխանությունից Հայաստանը փրկելու համար պետք է ավելի լուրջ պայքար, լուրջ ռեալիստական մի պլատֆորմի վրա, որի շուրջ միավորվելով քաղաքական ուժերը կապացուցեն, որ այն ինչ անում է Փաշինյանը դա խաղաղության ճանապարհ չէ, դա իրականում սողացող պատերազմի ճանապարհ է, երբ մենք կարող ենք ժամանակավորապես խաղաղություն շահել, հետո նորից ընկնել ծանր վիճակի մեջ։ Փաշինյանի այս քաղաքականությունը չի աշխատելու և նա խաբում է մեր ժողովրդին, ասելով, թե ինքը տանում է դեպի խաղաղություն։ Նա Հայաստանը դանդաղ խեղդելու օրակարգն է առաջ տանում, ինչի դեմը պետք է առնել։ Պետք է դեմը առնել այնպիսի քաղաքական պլատֆորմով, որը ցույց կտա, թե ոնց է հնարավոր գնալ խաղաղության։

- Քառօրյա պատերազմի ժամանակ առաջին նախագահ Լևոն Տեր–Պետրոսյանը պատրաստակամություն հայտնեց հանդիպելու Սերժ Սարգսյանի հետ, որպեսզի օգնի իշխանություններին դուրս գալ այդ ծանր իրավիճակից, արդյոք այս փուլում՝ Փաշինյանի առաջ քաշած խաղաղության օրակարգի հարցում, առաջին նախագահը պատրա՞ստ է հանդիպել Նիկոլ Փաշինյանին և օգտակար լինել։

- Նախագահը մի ամբողջ նախաձեռնությամբ հանդես եկավ, որ Հայաստանի բոլոր չորս ղեկավարները Վեհափառի հետ միասին, հավաքվեն, քննարկեն ստեղծված իրավիճակը և միասնաբար ընտրեն Հայաստանը այս ճգնաժամից դուրս հանելու ճանապարհը, իհակե շատ ելքեր էլ չկային, բայց պետք էր ընտրել չարյաց փոքրագույնը, բայց այդ ծրագիրը մերժվեց թե Նիկոլ Փաշինյանի, թե մյուս նախագահների կողմից։

- Ինչո՞ւ Նիկոլ Փաշինյանը մերժեց առաջին նախագահի առաջարկը։

- Ամբիցիան, անհիմն հավատը առ այն, որ ինքը այս ազգի փրկիչն է, առնվազն մեկ-մեկ ակնարկելով, որ համարյա Հիսուս Քրիստոսին հավասար է, շատ պարզ է, թե ինչն է իր սահմանափակությունը և անկարողությունը սեփական ամբիցիայից վեր կանգնելու։

- 2015 թվականին Լևոն Տեր-Պետրոսյանը Ազատության հրապարակից հնչեցրեց միասնական ընդդիմության կոդավորված ստրատեգիական պլանը, այն է՝ Դավալուից ցախավելը հեծած, Պուտինի հրաժարականը պահանջելով հասնում են Ազատության հրապարակ, ապա հասնում իշխանափոխության, արդյո՞ք այդ ստրատեգիական կոդավորված պլանը կապ ուներ Փաշինյանի Գյումրիից ոտքով քայլելու և իշխանափոխության հետ։

- Դե Նախագահը մի «փիս խասյաթ» ունի, ինչպես դասականներն են ասում, շատ հաճախ ճիշտ է դուրս գալիս, անկախ նրանից լուրջ է խոսում, թե հումորով։

Շարունակելի․․․ 

Սևակ Հովհաննիսյան