Որևէ մեկը քաղաքացուն չի ասելու՝ իջնի, նորից վճարի. Քաղաքապետարանում չգիտեն, թե նոյեմբերի 1-ից տրանսպորտի վճարման նոր տարբերակների անցման դեպքում առաջացած խնդիրներն ինչպես են լուծվելու
Նոյեմբերի 1-ից մայրաքաղաքի հանրային տրանսպորտի MAN, ZhongTong և GazelCity մակնիշի փոխադրամիջոցներից օգտվելու դեպքում գործելու է վճարման նոր կարգ՝ պարտադիր պայման է լինելու 100 դրամանոց մետաղադրամի կամ կատարված վճարումը հավաստող QR կոդի առկայությունը։ Մյուս՝ «Հոնդայի» մակնիշի ավտոբուսները շարունակելու են սպասարկել այնպես, ինչպես սպասարկում են հիմա։ Հետագայում՝ հունվարի 1-ից դրանք դուրս են գալու երթուղիներից։ Այս մասին «Փաստինֆոյի» հետ զրույցում ասաց Երևանի քաղաքապետի մամուլի խոսնակ Հայկ Կոստանյանը։
Դիտարկմանը, թե արդյոք մտավախություն չունեն, որ տրանսպորտային կոլապս է առաջանալու, քանի որ ինչպես մետրոյում է, մարդիկ բախվելու են բազմաթիվ տեխնիկական խնդիրների, ինչպես, օրինակ, երբ QR կոդերը չեն ճանաչում կամ տերմինալները կոդերը չեն տրամադրում, ընդհուպ, բացի այդ՝ հնարավոր է 100 դրամանոցներ չլինեն, ինչին ի պատասխան խոսնակը նշեց, թե սա անում են ոչ միայն ստվերը կրճատելու, ուղեւորների հետ վարորդների ֆինանսական շփումը նվազագույնի հասցնելու համար, այլև նպատակ ունեն մարդկանց հոգեբանորեն և տեխնիկապես նախապատրաստել հունվարի 1-ից միասնական տոմսային համակարգի անցմանը։
«Ինչպես գիտեք, հունվարի 1-ից առհասարակ կանխիկ գումարով տրանսպորտից օգտվելու հանրավորություն չի լինելու։ Լինելու են մի քանի վճարման համակարգեր՝ բանկային քարտերի, QR կոդերի, ինչպես նաև ամսական, եռամսյակային կամ տարեկան փաթեթներ։ Այս ժամանակահատվածը նաև տեխնիկական բոլոր խնդիրները վերհանելուն են ուղղված, որոնք կարող են առաջանալ հունվարից, երբ ամբողջական համակարգը կսկսի գործել»,- ասաց Կոստանյանը։
Հարցին, թե առաջացած տեխնիկական խնդիրները, երբ, օրինակ, մարդը շտապում է, բայց տերմինալից վերցրած QR կոդերը չեն աշխատում ինչպե՞ս են հանգուցալուծվելու, քաղաքացին պետք է իջնի՝ նոր կոդ վերցնելո՞ւ՝ նա նշեց, որ քաղաքացիների համար, իհարկե, որոշակի տեխնիակակն խնդիրներ են առաջանալու։ «Կդժվարանամ ասել, թե ինչպես են խնդիրները լուծվելու, բայց, բնականաբար, խոսք չկա այն մասին, որ որևէ մեկը քաղաքացուն ասելու է իջնի, նորից վճարի։ Հասկանում եմ, որ ցանկացած նոր բանի անցում բավական բարդ է, բայց մարդկանց համար մի մեծ մասն այսօր բանկային քարտով են վճարումներն անում, բայց քաղաքացին ունի մի քանի վճարման տարբերակ, որոնցից կարող է օգտվել»։
Անդրադառնալով ավտոբուսների տեսահսկմանը՝ նա ընդգծեց, որ եղել են դեպքեր, երբ գողությունների կամ վիճաբանությունների ժամանակ ՆԳՆ-ից տեսանկարահանումներ են պահանջել և ստացել են դրանք։ «Այդ տեսախցիկները օգտագործվելու են թե նշված դեպքերին հանգուցալուծում տալու համար, ինչպես նաև վարորդներին վերահսկելու համար՝ թե ուղևորների հետ շփվելու, թե ծխելու, թե այլ հարակից խնդիրները բացահայտելու տեսակյունից։ Այսինքն, եթե նման դեպքեր են առաջանում՝ դրանք ֆիքսելու ու վերահսկելու համար»։