Իսպանիայում ջրհեղեղի հետևանքով զոհերի թիվը հասել է 158-ի (տեսանյութ)

Իսպանիայում հորդառատ անձրեւների եւ ջրհեղեղների հետեւանքով զոհերի թիվը հասել է 158-ի, Euromedia24.com-ի փոխանցմամբ՝ հայտնում է 20minutos թերթը։

 

«Փրկարարական ծառայությունների աշխատանքը DANA փոթորկից առավել տուժած շրջաններում անխուսափելիորեն ուղեկցվում է ողբերգությամբ. Վալենսիա, Կաստիլիա-Լա Մանչա և Անդալուսիա ինքնավար համայնքներում սաստիկ փոթորկի հետևանքով արդեն մահացել է 158 մարդ: Նրանց ճնշող մեծամասնությունը՝ 155 մարդ, մահացել է Վալենսիա նահանգում»,- ասվում է հրատարակության կայքում։

 

Նշվում է, որ իշխանությունները որոշել են Վալենսիա ուղարկել Արտակարգ իրավիճակների ռազմական ստորաբաժանման (UME) ևս 500 աշխատակիցների, որոնք վերջին տարիներին դարձել են կառավարության հզոր գործիք անտառային հրդեհների, ջրհեղեղների և բոլոր տեսակի աղետների դեմ պայքարելու համար։ Նախկինում մարզ է ուղարկվել այս ստորաբաժանման 1200 զինծառայող։

 

Տեղական Europa Press գործակալությունը հայտնել է, որ Վալենսիա նահանգում աստիճանաբար վերականգնվում է էլեկտրաէներգիան։ Եթե ​​չորեքշաբթի օրը առանց էլեկտրականության էր մնացել 155 հազար տուն, ապա այժմ՝ ընդամենը 40 հազար։

 

«Ուժեղ փոթորիկը հարվածել է Ուելվա քաղաքին առավոտյան ժամը երկուսին՝ հեղեղելով քաղաքի մեծ մասը», - նշում է Pais կայքը:

 

Իսպանիայի կառավարությունը եռօրյա պաշտոնական սուգ է հայտարարել անձրեւների եւ ջրհեղեղների զոհերի համար։ Աղետը լրջորեն վնասել է ճանապարհային ենթակառուցվածքը Վալենսիայում՝ Իսպանիայի արևելքում ամենաշատ տուժած շրջանը, ինչի հետևանքով ավելի քան 60 ճանապարհ է փակվել: