Ֆիդանը նախազգուշացրել է Մերձավոր Արևելքում հակամարտության էսկալացիայի մասին

Եթե ​​Իսրայելը փորձի ոչնչացնել Իրանի միջուկային ներուժը, ապա հակամարտության՝ այլ երկրներ տարածվելու հավանականությունը կմեծանա, կարծում է Թուրքիայի արտգործնախարար Հաքան Ֆիդանը։

Իսրայելի ագրեսիվ գործողությունները տարածաշրջանում կարող են ավելի ինտենսիվ դառնալ ԱՄՆ նախագահական ընտրությունների ավարտից հետո։

«Իսրայելի հիմնական նպատակը պաղեստինցիներին Գազայից Եգիպտոս և Արևմտյան ափից Հորդանան վտարելն է»,- Ֆիդանի խոսքերը մեջբերում է թուրքական Hurriyet-ը։

Բանն այն է, ընդգծում է Ֆիդանը, որ Իսրայելը շարունակում է ավելի ու ավելի շատ նոր պայմաններ առաջ քաշել պաղեստինյան ՀԱՄԱՍ շարժման հետ բանակցություններում և դրանք օգտագործում է ժամանակ շահելու նպատակով՝ «իր ռազմական նպատակներին հասնելու համար»։

Այնուամենայնիվ, Թուրքիայի ԱԳՆ ղեկավարը պնդում է, որ Իսրայելի և ՀԱՄԱՍ-ի միջև հրադադարի շուրջ բանակցություններում որոշակի առաջընթաց կա։