Կիմ Չեն Ընի քույրը նախազգուշացրել է Կորեական թերակղզում հնարավոր պատերազմի մասին

Հյուսիսային Կորեայի առաջնորդ Կիմ Չեն Ընի քույրը՝  Կիմ Յո Չժոնը, ասել է, որ Կորեական թերակղզում և հարակից շրջաններում ուժերի անհավասարակշռությունը կարող է հանգեցնել պատերազմի։ Նա ընդգծել է, որ Հյուսիսային Կորեան կշարունակի ամրապնդել իր միջուկային զինանոցը, փոխանցում է ՏԱՍՍ-ը։

«Այսօր Կորեական թերակղզում և տարածաշրջանում մեր ու թշնամիների միջև ուժի հավասարության խախտումը անմիջապես նշանակում է պատերազմ, սա օբյեկտիվ իրականություն է, որը չի կարելի հերքել», - ասել է քաղաքական գործիչը։

Նա նաև մատնանշել է ԱՄՆ-ի, Ճապոնիայի և Կորեայի Հանրապետության կողմից նոյեմբերի 3-ին անցկացված համատեղ զորավարժությունները, որոնց մասնակցել են կործանիչներ և B-1B ռազմավարական ռմբակոծիչ: Այս զորավարժությունները, նրա խոսքով, ծառայել են որպես Հյուսիսային Կորեայի հակառակորդների գործողությունների թշնամական ու ագրեսիվ բնույթի հստակ ապացույց:

Կիմ Յո Չժոնը հավելել է, որ ԱՄՆ-ի և նրա դաշնակիցների կողմից զորավարժությունների հաճախակիացումը լուրջ սպառնալիք է խաղաղության և անվտանգության համար ինչպես ԿԺԴՀ-ի, այնպես էլ ողջ տարածաշրջանի համար:

«ԿԺԴՀ-ի՝ իր պաշտպանական միջուկային ուժերն ամրապնդելու քաղաքականությունը միակ ճիշտ ընտրությունն է ներկա պայմաններում, և մենք մտադիր չենք շեղվել այս ճանապարհից», - եզրափակել է նա։