Գյումրիում անիշխանությո՞ւն է տիրում․ Շիրակի մարզպետի անդրադարձը

«Մի՞թե Գյումրիում անիշխանություն է տիրում»,– ԱԺ-ում այս հարցն են լրագրողները տվել  Շիրակի մարզպետ Մուշեղ Մուրադյանին։ Ի պատասխան՝ Մուրադյանն ասաց՝ այս պահին Գյումրին համայնքապետ չունի, սակայն քաղաքը կառավարելի է։ 

«Բոլորը հրաժարական չեն տվել, աշխատակազմի ղեկավարը տեղում է, ախատանքները հնարավորինս իրականացվում են։ Բնական է, առանց համայնքապետ է այս պահին Գյումրին, բայց այս պահի դրությամբ արտառոց խնդիր չկա» ,- ասաց Մուրադյանը։ 

Անդրադառնալով այն տեղեկություններին, ըստ որոնց՝ Գյումրիում ՔՊ-ն վերադասավորումներ է իրականացնում, որոնց արդյունքում մարզպետը ևս կարող է դուրս մնալ պաշտոնից, Մուրադյանն ասաց․ «Ես նման տեղեկատվության չեմ տիրապետում, վերադասավորումների մասին խոսակցություն ընդհանրապես գոյություն չունի։ Ես Շիրակի մարզպետն եմ, իրականացնում եմ իմ լիազորությունները»։ 

Լրագրողների հարցին, որ Գյումրիի քաղաքապետի թեկնածու Կարեն Սարուխանյանի վարկանիշը շատ ցածր է, նա հակադարձեց. «Ո՞վ է ասում, ես միանշանակ կպնդեմ, որ մեր վարկանիշը շատ բարձր է: Վերջին շրջանում Անի համայնքում ունեցել ենք ՏԻՄ ընտրություններ և միանձնյա ստանձնել ենք այնտեղ իշխանություն: Իսկ Ախուրյանում ևս ՔՊ-ն եկել է իշխանության»,- շեշտեց նա։ 

«Մեր թեկնածուն Շիրակի մարզից է, Գյումրիից է, Շիրակի մարզպետ է աշխատել: Նա այս պահին էլ ԱԺ պատգամավոր է: Նրան հարգում են, սիրում են, ընդունում են, նաև թիմը»,- եզրափակեց Շիրակի մարզպետ Մուշեղ Մուրադյանը։