Կալիֆորնիայի ափերին հայտնաբերվել է «Դատաստանի օրվա ձուկ»
Կալիֆոռնիայի ափերին վեց ամսվա ընթացքում երկրորդ անգամ հայտնաբերվել է հազվագյուտ գոտի–ձուկ։ Սա նրա միակ անունը չէ. ցանկում ներառված են նաև «ծովատառեխի արքա», «Դատաստանի օրվա ձուկ» կամ «Ապոկալիպսիսի սուրհանդակ»: Բանն այն է, որ, ըստ լեգենդի, ծովային արարածը կանխագուշակում է բնական աղետները, նշում է The Guardian-ը։
Ձուկը հայնաբերվել է Կալիֆորնիայի հարավում՝ Էնկինիտաս քաղաքի լողափերից մեկում: Երեք ամիս առաջ մի խումբ անձինք բաց ծովում նման արարած էին տեսել։ Երկու նմուշներն էլ մեծ հետաքրքրություն են առաջացրել գիտնականների շրջանում, քանի որ նման ձկները հազվադեպ են մոտենում ափին։
«Դատաստանի օրվա ձուկը» սովորաբար ապրում է խորը ջրերում, որտեղ լույս չի թափանցում։ Նրա հիմնական տարբերակիչ հատկանիշը երկար ժապավենի նմանվող մարմինն է։ Ճապոնիայում ձուկը կոչվում է «ծովային վիշապ–աստծո պալատի սուրհանդակ»։ 2011 թվականի երկրաշարժից մի քանի ամիս առաջ Ճապոնիայի լողափերում ավելի քան 20 նման ձուկ էր հայտնաբերվել, ինչը տեղի բնակիչներից շատերն ընկալել էին որպես լեգենդի ուղղակի հաստատում։
Ամենադիտված 
Հունվարից երևանցին վճարելու է ամենաթանկ սակագինը տրանսպորտային երթևեկության համար
