ԵՄ-ին անդամակցելու ծրագրերը քննարկելու Հայաստանի մտադրությունները պատասխան են Ալիևին․ ռուս փորձագետ. News.am

Հայաստանը դեռ չի սկսում եվրաինտեգրումը, Հայաստանը պատրաստվում է քննարկել ինչ-որ օրինագիծ, որը ինչ-որ բան կասի Հայաստանի՝ Եվրամիությանն անդամակցելու ծրագրերի մասին, և սա նույնիսկ Եվրամիությանն անդամակցելու հայտ չէ։ Այս մասին NEWS.am-ի թղթակցի հետ զրույցում ասել է ՌԴ ԱԳՆ ՄԳԻՄՕ համալսարանի Հասարակական հետազոտությունների ինստիտուտի առաջատար գիտաշխատող, քաղաքագետ Նիկոլայ Սիլաևը։

«Ինձ թվում է, որ հիմա դա պաշտոնական Երևանի դիվանագիտական պատասխանի մի մասն է Ադրբեջանի նախագահի հայտարարությանը։

Ընդհանուր առմամբ, այս հայտարարությանը Հայաստանի արձագանքը բաղկացած էր երկու տարրից։ Առաջին տարրը Փաշինյանի շատ հաշտարար, զուսպ հայտարարությունն է հայ-ադրբեջանական հարաբերությունների վերաբերյալ։ Պատասխանի երկրորդ մասը (ոչ այնքան հաջող) վերը նշված օրինագծի ներդրումն է։

Ինչպես վերջին տարիներին բնորոշ է հայկական դիվանագիտությանը, այս օրինագծի հայտարարությունը քաղաքական ազդանշան է։ Այս քաղաքական ազդանշանն ուղղված է առաջին հերթին Եվրամիությանը, որը պետք է Բրյուսելին ցույց տա, որ Հայաստանը պոտենցիալ դաշնակից է, որը ձգտում է եվրաինտեգրման, և, հետևաբար, նրան պետք է օգնել»,- հավելել է Սիլաևը։

Նա նշել է, որ այս ազդանշանը, սակայն, չի կարող մեծ ոգևորություն առաջացնել Ռուսաստանում։

«Բայց ամենակարևորն այն է, որ անհասկանալի են այս ազդանշանի գործնական արդյունքները։ Ես չէի ակնկալի, որ Եվրամիությունը կամ եվրոպական առանձին երկրներ էապես կմեծացնեն Հայաստանին օգնությունը, եթե նա հայտարարի Եվրամիությանն անդամակցելու իր ծրագրերի մասին։

Այն օգնությունը, որը կարող է տրամադրել ԵՄ-ն, արդեն տրամադրվում է։ Փորձը ցույց է տալիս, որ նույնիսկ Ուկրաինայի դեպքում, որն այժմ շատ ավելի կարևոր է ԵՄ-ի համար, քան Հայաստանը, այս օգնությունը էական արդյունք չի տալիս։ Բայց այս ազդանշանը կփչացնի հարաբերությունները ԵԱՏՄ-ի գործընկերների հետ, որոնցից շատերը նաև ՀԱՊԿ-ի գործընկերներ են։

Ռուսական կողմից արձագանքը բավականին զուսպ էր։ Խոսքը պատասխան միջոցների կամ որևէ տեսակի պառակտման մասին չէ։ Ռուսաստանի փոխվարչապետ Ալեքսեյ Օվերչուկը պարզապես գնահատել է Հայաստանի տնտեսության համար ԵԱՏՄ-ի հետ հարաբերությունների խզման հետևանքները։ Ինձ թվում է, որ ռուսական արձագանքը կշարունակի կառուցված լինել այս զուսպ ձևով։

Հարևան Վրաստանը, որն արդեն ԵՄ անդամակցության թեկնածու է, ոչ մի օգուտ չի ստանում, բայց միևնույն ժամանակ նրանից պահանջում են խզել տնտեսական կապերը Ռուսաստանի հետ։

Եվրամիությունը այնքան առատաձեռն չէ, որքան 15 տարի առաջ էր: ԵՄ-ն իրեն միանալ ցանկացող երկրներից պահանջում է նախ կատարել մի շարք պայմաններ: Խոսքը Ռուսաստանի դեմ այն պատժամիջոցների ընդունումն է, որոնք ընդունել է Եվրամիությունը։

Միայն ԵՄ-ին ինտեգրման գործընթաց սկսելով և այս գործընթացից որևէ արդյունք չստանալով, Հայաստանը ստիպված կլինի սպանել իր արտահանումը դեպի Ռուսաստան և պետք է կրի շատ լուրջ տնտեսական վնաս։

Հայաստանը Եվրամիությանն անդամակցելուց հետո պետք է անցնի մի շրջան, երբ կխզի կապերը ԵԱՏՄ-ի իր գործընկերների հետ, բայց, ընդ որում,չի ստանա ԵՄ անդամակցության առավելությունները։ Եվ ոչ ոք չգիտի, թե ինչպես անցնել այս շրջանը՝ ո՛չ Հայաստանում, ո՛չ Բրյուսելում»,- ընդգծել է փորձագետը։