Մանկապարտեզներում կա մեկ կգ-ի համար 1600-1700 դրամանոց կարագ, սա նշանակում է որակի պահանջներին անհամապատասխանություն. Գեղամ Գևորգյան

Հասարակություն 27 Հունվար, 2025 13:15

«2024 թվականին ընդհանուր առմամբ 3 մլրդ 46 մլն դրամի տուգանք է նշանակվել, որից պետական բյուջե արդեն վճարվել է 1 մլրդ 124 մլն դրամ»,-հրավիրված ասուլիսում հայտնեց ՄՊՀ նախագահ Գեղամ Գևորգյանը

Նա նշեց, որ վճարումների մոտիվացիա է դարձել այն կարգավորումը, որ եթե տնտեսվարողը տույժերը վճարում է երկու ամսվա ընթացքում, ապա 25% քիչ է վճարում։

Գևորգյանի տեղեկացմամբ՝ գերիշխող դիրքի չարաշահման մասով եղած 26 վարույթից 22-ը ավարտել է, բանակցային ուժեղ դիրքի չարաշահմամբ եղել է 10 վարույթ, որից 8-ն ավարտված է և հակամրցակցային նորմի շրջանակներում եղել է 3 վարույթ, որից 1-ը ավարտվել է։

Հայտնելով, որ հակամրցակցային ոլորտում բենզինի գործընթացների վերլուծությունն է եղել՝ ՄՊՀ նախագահը նշեց. «Բենզինի շուկայում մենք ապացուցված համարեցինք, որ 4 խոշոր ներկրողները որոշակի ժամանակահատվածում անուղղակի համաձայնության են եկել գների սահմանման շուրջ և տեղի է ունեցել դեմպինգ՝ տնտեսապես չհիմնավորված գնիջեցում, իսկ հետագայում կրկին տնտեսապես ոչ հիմնավորված համաժամանակյա բարձրացրել են, ինչի արդյունքում 1 մլրդ դրամից ավել տուգանք է նշանակվել»։

Նա նշեց, որ բենզինի ոլորտում այլ տնտեսվարողների նույնպես պատասխանատվության են ենթարկելու։

«Մենք չենք կարողացել հստակ պատկերացում ունենալ, թե ներքին աուդիտի ծառայությունը գնելու ժամանակ պետությունն ինչ որակական չափանիշների վրա է խարսխում իր ցանկությունները։ Արդյունքում ունենում ենք դեպքեր, երբ ներքին աուդիտի հաշվետվություններ,որոնցում ամեն ինչ լավի մասին է և գինը շատ ցածր է, նշանակում է որակը շատ ցածր է»,-հայտարարեց Գեղամ Գևորգյանը՝ նշելով, որ առաջարկել է գերատեսչություններին ավելի հստակ չափանիշներ սահմանել, որպեսզի հասկայնան, թե ներքին աուդիտից ինչ են ուզում։

Հանձնաժողովի նախագահը տեղեկացրեց, որ հաճախ մանկապարտեզներում ունենում են կարագ և պանիր, որոնք գնի առումով բավականին էժան են և մարմինը կասկածներ ունի, որ դրանք տեխկանոնակարգման պահանջներին չեն համապատասխանում, և ուսումնասիրություններ կատարելուց հետո փորձում են այդ խնդիրը լուծեն։

«Ստացվում է, որ ՀՀ-ում մի իրականությունում մեջ կա մեկ կիլոգրամի համար 1600-1700 դրամանոց կարագ, բայց մյուս իրականության մեջ, որտեղ մենք ապրում ենք, դժվար է գտնել այդ գնի կարագ, այն անհամեմատ ավելի թանկ է»,-ասաց Գեղամ Գրիգորյանը և նշելով, որ օբյեկտիվ իրականության մեջ չկա նաև լիտրը 50-60 դրամ արժողությամբ կաթ, ինչպես մանկապարտեզներում է, հավելեց.«Սա նշանակում է, որ այդ սննդամթերքի արդյունքը չպետք է համապատասխանի տեխնիկական պահանջներին»։