Պուտինի դեմ մահափորձի նախապատրաստումն ուղիղ ճանապարհ է դեպի միջուկային պատերազմ․ Վոլոդին

Ամերիկացի լրագրող Թաքեր Կարլսոնի հայտարարությունը ԱՄՆ նախկին նախագահ Ջո Բայդենի վարչակազմի կողմից ՌԴ նախագահ Վլադիմիր Պուտինի դեմ մահափորձի մասին պետք է մանրակրկիտ հետաքննվի, հայտարարել է Պետդումայի նախագահ Վյաչեսլավ Վոլոդինը Telegram-ի իր ալիքում։

Ավելի վաղ Կարլսոնը հայտարարել էր, որ Բայդենի վարչակազմը «փորձել է սպանել» Պուտինին, սակայն Կարլսոնը մանրամասներ կամ ապացույց չի ներկայացրել։ Լրագրողն ընդգծել է, որ այդ փորձերը համարում է «խելագարություն»։

«Երեկ ամերիկացի լրագրող Թակեր Կարլսոնն ասաց, որ Բայդենի վարչակազմը «փորձել է սպանել Պուտինին»։ Դա առաջարկել է ԱՄՆ նախկին պետքարտուղար Բլինկենը։ Պուտինի դեմ մահափորձ պատրաստելը, նույնիսկ դրա քննարկումը հանցագործություն է։ Լուրջ սպառնալիք է համաշխարհային անվտանգությանը։ Միջուկային պատերազմ սկսելու ուղիղ ճանապարհ է»,- գրել է նա իր Telegram ալիքում։

Վոլոդինի խոսքով, դա պետք է հետաքննության հիմք դառնա բոլոր միջազգային կառույցների համար։ Նա նաև գրել է, որ Բայդենն ու Բլինկենը պետք է պատասխանատվության ենթարկվեն։