Մեծ Բրիտանիայում հղիության ժամանակ աշխատանքից հեռացված կինը գրեթե 48 մլն դրամ փոխհատուցում է ստացել

Բրիտանիայում հղիության ընթացքում աշխատանքից ազատված կինը ստացել է գրեթե 94 հազար ֆունտ ստերլինգ (գրեթե 48 մլն դրամ- խմբ․) փոխհատուցում։ Այս մասին հայտնում է The Independent-ը։

2022 թվականի հոկտեմբերին ներդրումային խորհրդատու Պաուլա Միլուսկան, ով աշխատանքի է անցել մարտին, տեղեկացել է հղիության մասին և հաջորդ ամիս ստիպված է եղել տնից աշխատելու թույլտվություն խնդրել իր ղեկավարից։

Մի քանի օր անց ղեկավարը հաղորդագրություն է ուղարկել իր ենթակային՝ հասկացնելով, որ նրան ազատել են աշխատանքից, քանի որ ընկերությանը պետք է աշխատակից, ով կարող է լինել գրասենյակում։ Դեկտեմբերի 1-ից կինն այլևս աշխատավարձ չի ստացել։

Կինը դատական ​​հայց է ներկայացրել իր գործատուի դեմ և հաղթել։ Դատավարության ժամանակ նրա նախկին ղեկավարը փորձել է ապացուցել, որ հղի աշխատակցուհուն աշխատանքից չեն ազատել, սակայն դա նրան չի հաջողվել։ Դատավորը որոշել է, որ կնոջ հղիությունն է եղել նրա անարդար ազատման պատճառը և նրան 93 600 ֆունտ ստերլինգ փոխհատուցում է տվել: