Լեհաստանի վարչապետը խոսել է Ուկրաինայի կապիտուլյացիայի հետևանքների մասին

Լեհաստանի վարչապետ Դոնալդ Տուսկը հայտարարել է, որ Ուկրաինայի «պարտադրված կապիտուլյացիան» կնշանակի նաև ամբողջ Արևմուտքի պարտություն՝ դրանից բխող բոլոր հետևանքներով։ Հրապարակումը հայտնվել է X սոցիալական ցանցի նրա էջում։

«Ուկրաինայի բռնի կապիտուլյացիան կնշանակի ամբողջ արևմտյան հանրության կապիտուլյացիան՝ այս փաստից բխող բոլոր հետևանքներով։ Եվ թող ոչ ոք չձևացնի, թե դա չի հասկանում»,- գրել է Տուսկը։

Փետրվարի 15-ին Մյունխենի համաժողովում Ուկրաինայի նախագահ Վոլոդիմիր Զելենսկին ԵՄ երկրներին կոչ է արել ստեղծել «Եվրոպայի զինված ուժեր», որոնք կարող են հիմնված լինել ուկրաինական բանակի վրա։ Ուկրաինայի նախագահը չի բացառել, որ ԱՄՆ-ը կարող է հրաժարվել եվրոպական երկրներին ռազմական աջակցությունից, և հայտարարել է, որ Ռուսաստանը կարող է հարձակվել ՆԱՏՕ-ի երկրների վրա, թեև ռուսական կողմը բազմիցս ընդգծել է, որ մտադիր չէ կռվել դաշինքի դեմ։