ԱՄՆ ՊՆ-ն «կդադարեցնի անհարկի ծախսերը»․ Պենտագոն

Պենտագոնի ղեկավարությունը ռազմական գերատեսչության բյուջեից 50 միլիարդ դոլար է հատկացնելու ԱՄՆ նախագահ Դոնալդ Թրամփի կողմից մատնանշված առաջնահերթ ոլորտներին, այդ թվում՝ «պատերազմները զսպելուն ու հաղթելուն»: Այս մասին ասված է պաշտպանության փոխնախարարի պաշտոնակատար Ռոբերտ Սալեսսի հայտարարության մեջ, գրում է ՏԱՍՍ-ը։

Ինչպես նշվում է փաստաթղթում, Պենտագոնի ղեկավար Փիթ Հեգսեթը հանձնարարել է իր ենթականերին վերլուծել ԱՄՆ նախկին նախագահ Ջո Բայդենի վարչակազմի կողմից մշակված 2026 ֆինանսական տարվա բյուջեն՝ որոշելու, թե որ ծախսերը «կարող են վերահղվել Բայդենի ցածրարժեք և ցածր առաջնահերթ ծրագրերից՝ նախագահ Թրամփի առաջնահերթություններին համապատասխան»:

Նշվում է, որ նախատեսվում է վերաբաշխել բյուջեի 8%-ը, որն ընդհանուր առմամբ կազմում է մոտ 50 մլրդ դոլար։ Պենտագոնի ղեկավարի տեղակալը նշում է, որ գերատեսչությունը մշակելու է ծախսերի ցուցակ, որոնք կարող են վերահղվել, այդ թվում՝ «պատերազմները զսպելու և հաղթելու համար»:

Սալեսսն ասել է, որ պաշտպանության նախարարությունը «կդադարեցնի անհարկի ծախսերը», ներառյալ կլիմայի փոփոխության, բյուրոկրատիայի ընդլայնման և բազմազանության, հավասարության և ներառման (DEI) հետ կապված ծրագրերը:

«Ազատված» միջոցները ուղղվելու են, մասնավորապես, սահմանների պաշտպանությանը և հակահրթիռային պաշտպանության նոր համակարգի՝ «Երկաթե գմբեթի» ստեղծմանը, նշել է նա։