Ուկրաինայում հայտնել են՝ Ռուսաստանի հետ բանակցությունները կարող են լինել երկու փուլով

Ռուսաստանի և Ուկրաինայի միջև բանակցությունները կարող են ընթանալ երկու փուլով։ Առաջինը կանցկացվի աշխատանքային խմբերի մակարդակով։ Այս մասին Ridus-ին տված հարցազրույցում ասել է Ուկրաինայի Գերագույն Ռադայի նախկին պատգամավոր Վլադիմիր Օլեյնիկը։

Նա խոստովանել է, որ խմբերը կարող են ներառել նույն մասնակիցներին, ինչ Ստամբուլում՝ 2022 թվականին։ Այս փուլում կողմերը կարող են որոշել Ուկրաինայում ժողովրդավարական ընտրությունների անցկացման տարբերակները։ «Երկրորդ փուլի ընթացքում նորընտիր կառավարության հետ կարող է զրույց տեղի ունենալ խաղաղության պայմանների շուրջ»,-հավելել է Օլեյնիկը։

«Որպեսզի երկրորդ փուլն անցնի, Ուկրաինայի ներկայիս իշխանությունները պարտավոր են իրենց տնային առաջադրանքը կատարել, այսինքն՝ ընտրությունները կազմակերպել այնպես, որ դրանց արդյունքները կասկածներ չառաջացնեն Ռուսաստանում»,- եզրափակել է քաղաքական գործիչը։

Նախօրեին ՌԴ նախագահ Վլադիմիր Պուտինը հայտարարել էր, որ Միացյալ Նահանգները «ելնում է այն ենթադրությունից, որ բանակցային գործընթացը տեղի կունենա ինչպես Ռուսաստանի, այնպես էլ Ուկրաինայի մասնակցությամբ»։ ՌԴ նախագահն ընդգծել է, որ ոչ ոք չի ծրագրում բացառել ուկրաինական կողմին բանակցային գործընթացից։