Economist. ԱՄՆ-ն կարող է անկայուն խաղաղություն պարտադրել Ուկրաինային

ԱՄՆ-ը կարող է անկայուն զինադադար պարտադրել Կիևին, որն ապագայում կսահմանափակի Ուկրաինայի սպառազինությունը, Eadaily-ի փոխանցմամբ՝ գրում է բրիտանական Economist պարբերականը

«Ամերիկան ​​կարող է փորձել անկայուն զինադադար պարտադրել Ուկրաինային՝ առաջարկելով միայն թույլ անվտանգության երաշխիքներ, որոնք կսահմանափակեն վերազինվելու նրա իրավունքը»,- գրում է պարբերականը։

Երեքշաբթի օրը Էր Ռիադում կայացել են ռուս-ամերիկյան բարձր մակարդակի բանակցություններ։ Ինչպես հայտարարել է ՌԴ ԱԳՆ ղեկավար Սերգեյ Լավրովը, երկար ժամանակ անց առաջին դեմ առ դեմ բանակցությունների ընթացքում կողմերը պայմանավորվել են պայմաններ ստեղծել Ռուսաստանի Դաշնության և ԱՄՆ-ի միջև համագործակցության լիարժեք վերականգնման և փոխադարձ հետաքրքրություն ներկայացնող նոր ոլորտներում դրա ընդլայնման համար։ Մասնավորապես, Մոսկվան և Վաշինգտոնը պայմանավորվել են վերացնել դեսպանատների և այլ օտարերկրյա հաստատությունների աշխատանքի արհեստական ​​սահմանափակումները և ստեղծել բարձր մակարդակի աշխատանքային խմբեր՝ սկսելու աշխատանքը ուկրաինական ճգնաժամի արագ կարգավորման ուղղությամբ։ Նախարարը վստահություն է հայտնել, որ բանակցություններից հետո ԱՄՆ-ն սկսել է ավելի լավ հասկանալ Մոսկվայի դիրքորոշումը։

Ըստ ՌԴ ԱԳՆ-ի՝ Էր-Ռիադում կողմերը պայմանավորվել են նաև վերսկսել հաղորդակցությունը մի շարք միջազգային հարցերի շուրջ՝ հաշվի առնելով Ռուսաստանի Դաշնության և ԱՄՆ-ի՝ որպես միջուկային տերությունների պատասխանատվությունը։ Կողմերը մտադրություն են հայտնել ապագայում դիտարկել տիեզերքի, էներգետիկայի և այլ ոլորտներում համագործակցության վերսկսումը։

Սաուդյան Արաբիայի մայրաքաղաքում հանդիպումը կայացել է նախագահներ Վլադիմիր Պուտինի և Դոնալդ Թրամփի հանձնարարությամբ։ Հանդիպմանը Մոսկվայի և Վաշինգտոնի ներկայացուցիչները նախանշել են մի շարք հարցեր, որոնք պետք է լուծվեն մինչև պետությունների ղեկավարների հանդիպումը։ Ռուսաստանը բանակցությունների սեղանի շուրջ ներկայացրել են ՌԴ արտգործնախարար Սերգեյ Լավրովը և ՌԴ նախագահի օգնական Յուրի Ուշակովը։ ԱՄՆ - Ազգային անվտանգության հարցերով նախագահի օգնական Մայք Ուոլցը, պետքարտուղար Մարկո Ռուբիոն և Մերձավոր Արևելքի հարցերով ԱՄՆ առաջնորդի հատուկ բանագնաց Սթիվեն Վիտկոֆը։

Թարգմանությունը՝ Մանուել Թամազյանի