Մեքսիկայի իշխանությունները ԱՄՆ-ի պատճառով` ծրագրում են փոխել սահմանադրությունը

Մեքսիկայի իշխող «Ազգային վերածնունդ շարժում» կուսակցությունն առաջարկել է բարեփոխել հանրապետության սահմանադրությունը՝ ԱՄՆ-ի գործողությունների դիմաց իր ինքնիշխանությունն ամրապնդելու համար: Այս մասին հայտարարել է երկրի նախագահ Կլաուդիա Շեյնբաումը, մեջբերում է Washington Post-ը։

«ԱՄՆ-ն իրավունք չունի խախտելու մեր ինքնիշխանությունը»,- ասել է քաղաքական գործիչը՝ արձագանքելով այն փաստին, որ ԱՄՆ Պետդեպարտամենտը մեքսիկական Sinaloa և Jalisco Nueva Generación կարտելները ճանաչել է՝ որպես օտարերկրյա ահաբեկչական կազմակերպություններ։

Թմրավաճառների համար այս կարգավիճակը Վաշինգտոնին հնարավորություն կտա կիրառել հատուկ պատժամիջոցներ, ինչպես նաև թույլ կտա ԱՄՆ-ին հետապնդել նրանց, ովքեր աջակցում են կարտելներին: Բացի այդ, կընդլայնվեն ամերիկյան հետախուզության հնարավորությունները։

Ինչպես նշել է Շեյնբաումը, Մեքսիկան պատրաստ է համագործակցել Միացյալ Նահանգների հետ կազմակերպված հանցավորության դեմ պայքարում, սակայն թույլ չի տա իրեն «ենթարկվել»։